Australia-UNICEF Apoiu Ekipamentu Ba HNGV

DILI, STLNEWS.co – Ministeriu Saude agradese ba governu Australia no UNICEF neebe apoiu ona ekipamentu ba iha Hospital Nasional Guido Valadares (HNGV), hodi haforsa no hametin sistema saude nasional nian.

Visi Ministru Saude, Bonifacio Maucoli dos Reis informa, hodi MS nia naran, dala uluk agradese no hatoo obrigadu barak ba Embaixador, reprezentante UNICEF no DFAT neebe konvida prezente iha HNGV hodi halao serimonia ba entrega ekipamentus no abastesimentu banku de sangue ba hospital nee.

“Imi nia apoiu nudar sentidu solidariedade atu haforsa, hametin no melhora ami nia sistema Nasional Saude ho objetivu atu hadiak komunidade Timor-Leste nia saude no moris diak iha nivel nasional, munisipal, Postu Adminstrativu, Suku no Aldeia, ikus liu mak komunidade no familia idak-idak, partikularmente fortelese servisu Kuidadus Banku de Sangue HNGV,” dehan nia liu husi nia diskursu iha HNGV, Kinta nee (27/04/2023).

Nia afirma, MS tau iha konsiderasaun no rekonhese katak, kolaborasaun no kooperasaun hamutuk ho parseiru dezenvolvimentu, parte interesadu ka stakeholders, ajensia nasoens unidas, ajensia doadores mak pertinente tebes atu alkansa vizaun, misaun no meta neebe defini tiha ona iha Planu Estratéjiku Dezenvolvimentu Nasional Setor Saude edisaun daruak nian tinan 2020–2030.

Nia dehan, profisional saude HNGV no Unidade Banco de Sangue tomak, ohin Hospital Nasional Guido Valadares hetan apoiu ekipamentus sira nee.

Iha fatin hanesan, Adjunta Reprezentante husi UNICEF, Ainhoa Jaureguibeitia informa, haksolok tebes hodi partisipa iha serimonia entrega ekipamentu no suprimentus Banku Sangue nian ba MS.

“Hau senti onradu tebes atu entrega ekipamentu no suprimentu banku de sangue ba Ospital Nasional Guido Valadares, rekonhese ida nee sei tulun atu asegura katak, Timor-Leste iha servisu neebe ho kualidade iha unidade banku sangue hodi suporta atendimentu saude ba pasiente sira bainhira iha nesesidade,” hatete nia.

Nia dehan, ekipamentu no suprimentu sira atu entrega ohin loron mak, Platelet Incubator, unidade rua (2), no Centrigue BT20A unidade hitu (7), iha mos Haemoglobin test kompletu unidade sanulu (10), no Terumo Wafer TSCD SC*WO017 nee iha nidade Lima-nulu (50) inklui mos Ultra-low temperature freezer nidade ida (1).

Nunee mos Diretur Ezekutivu Interinu HNGV Jony Francisco dos Santos Silva informa, lori hospital Nasional guidu Valadares nia naran hakarak hatoo agradese ba UNICEF no governu Australia.

“Tanba apoiu tan ona akipamentu sira ba HNGV, liu-liu ba departamentu Banku de Sangue, ekipamentu sira nee importante tebes ba ami hodi halo teste raan no konserva raan,” dehan nia.

(nat)

LEAVE A REPLY

Please enter your comment!
Please enter your name here