DILI, STLNEWS.co – Kazu bebe mate iha inan nia kabun laran, kauza husi infeksaun no malnutrisaun husi inan. Ida nee bele halo bebe mate iha inan nia kabun laran.
Tuir Reprezentante UNFPA iha Timor-Leste, Pressia Arifin-Cabo hatete, kazu still berth nee bebe hotu-hotu neebe mate ka moris mai la dada iis ona, iha bebe balun moris mai nee isin dodok ona.
Nia dehan, atu fo deit vigora ida ba imi katak, iha tinan kotuk 2022 nee, dadus sira neebe mai husi Sentru KEmON-B nee iha Sentru Saude Likisa, bebe mate iha inan nia kabun laran nain 22 iha Ermera, Gleno iha nain 23, depois hospital Baukau iha 33, agora iha Dili laran nee iha 123.
“Enjeral bebe mate iha kabun laran nee kauza husi infeksaun ho malnutrisaun, dala barak inan isin rua sira nee mai konsulta tarde, entaun bebe hetan tiha ona infeksaun. Bainhira ita halao teste ba HIV, sifilis ho hepatitis B sira nee ita la halo, entaun ida nee halo labarik sira mate iha kabun laran. Tanba tarde halo intervensaun, depois mal nutrisaun, sira mai ho nutrisaun neebe la diak. Ida nee bele halo bebe anemiku kedas ona iha kabun laran, entaun bebe la dezenvolve ho diak, bebe bele mate antes moris,” dehan nia ba jornalista iha salaun Kofi Anan Kaikoli, Kuarta lokraik (23/08/2023).
Nia afirma, labele haluha katak nee bele aumenta, tanba ita la sura ho sira neebe mak tur ahi iha uma.
Nia afirma, bebe sira neebe mak mate iha kabun laran kauza mos husi kuidadus antenatal, karik kualidade husi kuidadus antenatal ladun diak, entaun bebe bele mate barak liu tan.
“Hau kontenti, tanba IX Governu nia prioridade ida mak atu hasae taxa kobertura ba kuidadus antenatal ba inan isin rua, nee ba dala haat hasae ba 70%, nee sura ba numeru karik inan hamutuk 32 mil mak sei kobre iha servisu kuidadus antenatal ida nee,” hatete nia.
Nia akresenta, agora atu halo ida nee klaru presiza orsamentu, agora orsamentu nee tenki refleta iha programa ka objetivu nee, entaun orsamentu nee hadia kuidadus antenatal.
(nat)
