Dadus Malnutrisaun Iha Redusaun

DILI, STLNEWS.co – Tuir peskiza husi Ministeriu Saude (MS) no parseiru sira halao iha tinan 2020, kompara ho peskiza neebe mak halao iha 2016 nee, iha redusaun ba numeru malnutrisaun, maibe redusaun ho numeru kiik.

“Ita iha peskiza ida neebe mak halo iha 2020 no ita halo komparasaun peskiza neebe mak halo iha tinan 2016, neebe mak numeru ba labarik sira krekas nee ita iha redusaun, entaun ita iha redusaun ba iha 46 ba iha 40, numeru neebe mak redus nee kiik oan, maibe prontu, ida nee servisu MS nia,” lia hirak nee hatoo husi Ministra Saude Odete Maria Freitas Belo ba jornalista iha MNEK, Segunda nee (17/04/2023).

Nia hatutan, persentajen raes badak 58% iha tinan 2009 tuun ba 46% iha tinan 2016, todan menus husi 45% tuun ba 40% iha 2016 no isin krekas nian mak sae oitoan husi 19% ba 24%.

Tanba malnutrisaun nee rasik kauza husi buat barak, maibe hakarak deit atu fo espesifiku liu ba kazu malnutrisaun iha labarik sira liu-liu idade tinan 2 mai kraik, nee akontese tanba fator ida mak pratika fo han neebe lalos haree husi primeiru waihira bebe moris mai, inan sira la fo susu been eskluzivu too fulan 6, maibe introdus hahan sedu inklui troka inan nia susu been ho hemu/bebida seluk.

Timor Leste iha taxa ba mortalidade materna tuir peskiza DHS 2016 iha 195/100,000 nados vivos no Pregnancy Related Mortality 218/100,000 nados vivos.

Nia hatutan, maske numeru redus maibe numeru nee sei iha neeba, bainhira kuandu ita halo komparasaun ho nasaun sira iha sudeste aziatiku ita sei iha pozisaun neebe aas, entaun MS presija servisu no halo esforsu diak liutan, para bele halo redusaun, redusaun ba kazu labarik sira neebe mak krekas nomos ba inan isin rua sira.

Nunee mos Prezidente Republilka Jose Ramos Horta informa, iha buat barak problema husi kultura, tanba ita nia Komunidade balun hatete bele han ida nee no labele han ida nee ba, entaun ho problema sira nee.

“Hau nafatin suporta parseiru sira hodi ajuda ministeriu saude atu halo promosaun kona ba aihan no susuben sira ba inan isin rua no ba labarik sira, “dehan nia.

Nia mos hatoo agradesimentu ba Ministra Saude hodi partisipa iha seremonia lamsamentu ba kampanha susu ben ba labarik.

Aleinde nee, repzentante Organizasaun Mundial Saude iha Timor Leste, Arvind Mathur informa, parte OMS nia kontinua apoiu governu TL no MS atu haree kona ba malnutrisaun iha TL.

“Ami nafatin suporta governu TL hodi apoiu aihan no material sira atu tau matan nafatin ba inan isin rua sira no labarik sira iha parte nutrisaun nian,” tenik nia.

(nat)

LEAVE A REPLY

Please enter your comment!
Please enter your name here