Desizaun Inresponsavel MS, Pasiente 30 Hakotu Vida

DILI, STLNEWS.co – Reprezentante povu iha uma fukun Parlamentu Nasional (PN) lamenta ho desizaun inresponsavel husi Ministra Saude (MS) Elia Amaral, pasiente 30 resin hakotu vida iha Hospital Nasional Guidu Validares (HNGV), tanba krizi atendimentu husi pesoal saude sira.

Deputada Bankada FRETILIN, Helena Martinz dehan, departamentu moras hadaet nian, ema nain 4 mate iha loron 3 nia laran. Mediku sira iha neeba halerik katak, tanba maluk pesoal saude maioria hasai hotu, agora daudaun iha infermeiru rua deit, la bele tau matan ba ema hotu.

“Iha HNGV pasiente 30 liu mak mate iha periodu krizi atendimentu ida nee, balun mate tanba destinu duni karik, maibe balun mate tanba falta atendimentu no medikamentu. Ida nee dadus husi HNGV, ita seidauk hatene husi hospital referal no munisispiu sira, tanba deit desizaun inresponsavel neebe komete husi Ministra saude,” dehan nia liu husi deklarasaun politika Bankada FRETILIN iha PN, Segunda (15/01/2024).

 Nia afirma, Bankada FRETILIN hatoo sentidu kondolensia no solidariedade ba familia sira neebe lakon nia ema, no pasiente sira neebe agora daudaun sai vitima, tanba deit desizaun vingativu no inresponsavel ida nee.

“FRETILIN deskonfia governu liu husi MS ho propozitu (sengaja) atu oho povu liu husi rebenta tiha sistema saude publika neebe povu kbiit laek sira tau esperansa ba, hanesan saida mak mediku senior ida iha HNGV hateten, situasaun agora iha HNGV nee hanesan planu anikilamentu (pembunuhan),” tenik nia. 

Nia tenik, tanba ema hotu hatene atendimentu ba moras sira lao rutinidade, tanba moras sira iha hela deit, durante nee fatin balun pesoal saude la too, maibe hapara tiha profisional saude sira la ho substitutu. 

Nia haktuir, mediku iha HNGV hatoo lamentasaun katak, hakarak troka ho militante partidu nian ruma mos laiha buat ida, maibe rekruta tiha mai mak hasai sira ida tuan nee, para iha ema kontinua halo servisu, tanba moras sira nee presiza atendimentu, la hein rekrutamentu hotu mak sira moras nee lae.

“Ami hakarak apela ba publiku katak, ita labele nonok ho situasaun agora, se ita husik situasaun nunee nafatin, liafuan padre Domingos Maubere nian ida dehan, ita prepara aan atu hakoi mate deit, nee sei sai realidade. Tanba nee FRETILIN sei la nonok, ami sei luta atu hetan lia los no too hetan responsabilizasaun husi governu,” afirma nia.

Nia sublina, tanba semana kotuk Bankada FRETILIN halo fiskalizasaun ba HNGV rona lia-halerik sira neebe profisional saude sira hatoo katak, iha servisu emerjensia durante nee pesoal saude kada turnu ema nain 10 ka 11 mak tama servisu, derepente hapara funsionariu kontratadu, agora turnu ida hela deit nain 3 mak servisu, entaun too pasiente sira mai barak mak la biban atu atende.

Nia hatutan, iha sala pediatria ka fatin labarik no bebe baixa, profisional saude ida hateten, mediku limitadu tebes. Mediku no enferemeiru liu metade mak nia kontratu hapara, entaun ema la too atu tau matan ba labarik no bebe sira neebe moras, no agora tama ona tempu udan, bainhira dengue mosu bele sai problema boot, tanba pasiente dengue nee bele sai barak no presiza monitoring intensivu.

(dom)

LEAVE A REPLY

Please enter your comment!
Please enter your name here