Dili Kontinua Rezistu Kazu Foun 37

DILI, STLNEWS.co – Ohin loron 1 fulan Abril tinan 2021, liu husi Centru Integradu Gestão de Crises, Sala Situação (CIGC-SS) fo sai ba publiku katak, Munisipiu Dili kontinua rezistu kazu Covid-19 hamutuk nain 37.

Liafuan nee haktuir husi Koordenador Forsa-Tarefa ba Prevensaun no Mitigasaun Surtu Covid-19 iha Timor Leste (CIGC-SS), Rui Maria de Araújo ba jornalista sira liu husi Zoom Call iha CCD, Kinta (01/03/2021).

“Evolusaun surtu Covid-19 ohin iha munisipiu Dili nian, ita rezistu tan kazu foun neebe konfirmadu positivu nain 37,” hatete Rui.

Tanba nee kazu detetadu ka pozitivu iha munisipiu Dili hahu husi loron 7 Marsu too loron 1 Abril hamutuk hotu nain 493, nee baze ba informasaun neebe ekipa konjunta saude nian rekolla, foku/cluster kazu pozitivu iha Dili, hetan revizaun hanesan.

Nia esplika, iha munisipiu Dili, sei iha cluster 48 mak sei nafatin hatudu atividade hadaet tutan virus husi ema ida ba ema seluk, liu-liu iha Suku Madohi, Bebobuk, Fatuhada, Comoro, Bairro Pite, Motael, Kulu-Hun, Lahane Oriental no Becora.

Aleinde nee, husi horisehik mai ohin hotu LNS halo 1.228 testes PCR, inklui 137 testes ba ema neebe halo pedidu atu hetan autorizasaun esepsional hodi sai husi serka sanitaria iha Munisipiu Dili.

Nia informa, total pedidu autorizasaun esepsional atu sai husi serka sanitaria iha Munisipiu Dili, horisehik loron 31 Marsu, hamutuk hotu 118. Sekretariadu CIGC responde hotu kedas, maibe 32 pedidus la prienxe kriteriu tuir resolusaun governu.

Entertantu dadus jeral hanesan ohin kazu foun ohin nian 39, kazu rekuperadu nian 3, nomos kazu ativu neebe oras nee dadaun izolamentu iha Vera Cruz no tasi tolu hamutuk nain 45, husi total kazu foun ohin mane nain 20, feto nain 19, iha nain 4 Sintomatiku no 35 mak asintomátiku.*

Reportajen: Jeniche da Costa
Editora: Domingas Gomes

LEAVE A REPLY

Please enter your comment!
Please enter your name here