DILI, STLNEWS.co – Dirasaun Nasional Farmasia no Medikamentu (DNFM) ho Servisu Autonomo Medikamentu no Ekipamentu Saude (SAMES), hapara aimoruk paracetamol tablet neebe mak husi India, tanba munda kores.
Kestaun nee hatoo husi Diretor Nasional Farmasia Medikamentu, Delfim Ferreira katak, foin daudaun hetan ona relatoriu husi pesoal sira farmasiotika iha sentru saude no hospital sira, relata mai iha servisu farmasia vizilansia Ministeriu Saude (MS) katak, iha aimoruk item ida mai husi India, nee paracetamol tablet paravec 500 nee.
“Ita kompra iha tinan 2022 nee, ho kuantidade 1 miloens ital tabletas, nee iha problema ho mudansa kores no aimoruk nee oituan, entaun aimoruk ida nee ami orienta ona atu hapara lai. Ita prevene atu nunee labele fo impaktu ba iha komunidade nia saude, depois ami mos halo investigasaun ba iha situasaun ida nee, ami deskonfia mos iha prosesu distribuisaun husi fabrik too iha suplay, depois mai too iha SAMES, dala ruma impaktu mos husi iklima neebe mak manas, bele kontribui,” dehan nia ba jornalista iha armajen SAMES, Kampu Alor, Sesta (25/08/2023).
Nia haktuir, maibe DNFM mos komunika ona ho suplayer neebe mak hatama aimoruk nee mai nee katak, iha duni problema oituan mai husi fabrika, entaun internalmente sira komunika ona ba quality kontrolu iha manufaktura neeba, para sira bele troka.
“Tanba nee mak ita labele kontinua distribui, maibe suspende ka hapara lai, neebe aimoruk sira nee ita rekolla ona iha fasilidade saude sira,” tenik nia.
Iha fatin hanesan, Diretor Ezekutivu SAMES Santana Martins informa, aimoruk ida nee deteta duni kuality kontrolu liu husi labotoriu SAMES nian.
“Ita deteta duni, no ita mos husu ba kompania halo ona konfirmatoriu iha ninia manufaktura, nee hatudu katak, iha neeba mos sira iha duni mudansa kores. Neebe agora dadauk nee ita hasai ona karta sama atensaun ba kompania, depois sira halo konfirmatoriu ba iha neeba, sira tenki fo resposta urjente, atu nune ita mos halo prosesu rekolamentu husi fasilidade saude sira,” haktuir nia.
Entaun nafatin koalia ho kompanhia sira, para sira iha responsabilidade, nunee sira bele halo fali subtituisaun aimoruk seluk.
(nat)
