DILI, STLNEWS.co – Doutor espesialista husi Alemanha, Vincent Everard Jerome Braganza entrega makina USG 2 ba Cruz Vermelha Timor Leste (CVTL) ho Klinika Bairo Pite (KBP).
Lia hirak nee hatoo husi Xefi Casa Civil Prezidente Republika, Jesuinha Maria Ferreira Gomes ba jornalista sira iha Bairo Formoza, Tersa (10/10/2023).
Nia dehan, Doutor Braganza mai iha Timor liu husi Prezidensia Republika, tanba Prezidensia Republika mak fasilita Doutor Braganza mai iha Timor, no primeira vizita nia mai Timor iha 2014.
Nia afirma, agora tinan ida nee Doutor Braganza mai tan, atu halo formasaun konsulta ba profesional saude sira, nomos entrega makina USG 2, neebe lori husi Alemanha mai.
“Durante doutor mai iha Timor besik fulan ida, neebe doutor nee halo ona formasaun ba profisional saude sira hamutuk 80. Husi numeru nee nain 20 husi Hospital Referal Maliana no nain 20 ba Asosiasaun Medika Timor Leste, nain 20 husi CVTL ho Klinika Bairo Pite nomos fo formasaun ba profesional saude iha HNGV 20, total hamutuk 80,” tenik nia.
Iha fatin hanesan, Prezidente CVTL Madalena Hanjan informa, ekipamentu USG nee importante tebes ba CVTL.
“Ami nia mediku voluntariu infermeiru, mediku sira kontinua sira nia servisu husi momentu Covid-19 nian, nee sei kontinua servisu nafatin ajuda iha CVTL,” katak nia.
Nia afirma, nee duni sira mos halo movimentu iha moras sira, laos iha klinika CVTL maibe halo servisu liu husi kuidadu saude primaria, lori ba iha klinika sira, no dala ruma mos lori too iha hospital.
Tuir atividade CVTL nian husi ekipa mediku sira. Makina nee sei lao iha movimentu, tanba CVTL seidauk iha klinika, i futuru nia sei iha klinika rasik, maibe agora nee halo deit movimentu iha nee, iha sentru kolensaun ba iha ran.
Nunee mos Diretor Klinika Bairo Pite, Inacio dos Santos informa, makina USG nee hodi halo USG ba inan isin rua sira.
“Tanba ita kazu mortal idade ba inan mos aas, kuidadu saude primaria liu-liu ba inan isin rua, i kuidadu saude maternu infantil sai problema boot neebe mak ita hasoru iha Klinika Bairo Pite,” tenik nia.
Atividade neebe fornese lao too agora, posibilidade tanba suporta husi dotor Braganza suporta klinika Bairu Pite, liu husi material no suporta kapasitasaun ba mediku sira.
Iha fatin hanesan, Mediku Espesialista Vincent Everard Jerome Braganza informa, makina USG nee hodi halo deteta ba moras sira.
“Neebe tempu ida hau mai fali Timor, hau sei lori tan akipamentu seluk no makina USG hodi apoiu ba mak iha Atauro,” hakotu nia.
(nat)
