EBF No.5 Comoro Tuir Kriteria MS

Koordenador EBF No.5 Comoro, Fernando Barreto. (Foto: STL)

DILI, STLNEWS.co – Eskola Ensinu Basiko Filial EBF No.5 Comoro halao prosesu aprendizajen lao tuir kriteria Ministeriu Saude (MS) no Ministeriu Edukasaun (ME) neebe estabelese ona.

Informasaun nee hatoo husi koordenador EBF No.5 Comoro, Fernando Barreto ba STL, iha nia knaar fatin Segunda (8/02/2021), hatete iha tempu Estadu Emerjensia (EE) nia laran eskola lao normal maibe tuir orientasaun no lao tuir kriterias neebe Ministeriu Saude no Ministeriu Edukasaun establese ona.

“Por ezemplu hanesan estudantes tenki fahe grupu, entaun iha nee ami mos halo tuir regras sira nee, nomos estudante sira fahe ba grupo rua (2) ou A No B, grupo A eskola iha loron tolu husi Segunda, Tersa, Kuarta no B tama fali iha Kinta, Sesta, Sabadu,” dehan koordenador.

Koordenador nee hatutan katak konaba kurikulum eskola nee rasik iha mudansa ruma karik, husi ministeriu mak halo mudansa no bele fo mai eskola para halo mudansa, atu nunee lao tuir kurikulum neebe ke iha maibe tempu mak la too tamba mestri sira atu lao tuir.

“Kontiudu ou materia neebe ke iha labele tamba estudante sira ami fahe tia ona ba grupo rua (2) no iha Segunda too iha Kuarta no mos ami hanorin nafatin kontuido nee ba alunos sira para bele hanesan, tan ida nee mak prosesu aprendizajen neebe husi ami eskola nee nia,” tenik nia.

Nia mos hatutan, dezafiu ba eskola nee rasik mak tempu hanorin la too tamba estudantes no mestri sira lao tuir regras neebe relasiona ho moras Covid-19 nia, entaun fahe ba grupu tamba estudante barak mak lakon oportunidade ou lakon tempu, tamba durasaun neebe mestri sira hanorin nee la too ba tempu neebe ke iha.

“Ami lao tuir duni orientasaun husi Ministeriu Saude neebe fo sai, maibe wainhira konaba distansiametu sosial hau haree defisil ituan, maske ami orienta ona ba estudantes sira tenki tuir mais labarik barak, entaun ami la bele tuir sira para fahee dook husi fatin maibe ami esforsu nafatin para bele orienta ba sira no esplika para lao tuir regras neebe ke iha, maibe defisil para atu bele lao tuir ba iha 100% no sei implemeta nafatin atu estudantes sira tuir nafatin regras neebe establese ona,” haktuir nia.

Aleinde nee mos, iha eskola nee rasik prepara ekipamentu hanesan balde sabaun no bee atu alunos sira fase liman, nunee mos konaba maskara nee eskola fo hatene ba inan aman sira atu sosa para estudantes sira uza antes tama aula simu materia husi professores sira, no profesores sira mos tau maskara hodi hanorin alunos sira.*

Reportajen: EST/JO
Editor: Ekipa STL

LEAVE A REPLY

Please enter your comment!
Please enter your name here