Ekipa Juri Entrega Lista Funsionariu Kontratadu Admitidu 229 Ba HNGV

DILI, STLNEWS.co – Ekipa Juri Ministeriu Saude (MS) ohin entrega ona lista kontratadu admitidu nain 229 ba Hospital Nasional Guido Valadares (HNGV), hodi halao servisu tuir area neebe mak sira konkore.

Lia hirak nee hatoo husi Prezidente Komisaun Permanente Rekrutamentu ba Kontratadu iha Ministeriu Saude, Julio do Santos katak, ohin ekipa rekrutamentu finaliza ona HNGV, ohin entrega ona ba konselhu dirativa HNGV hodi selebra kontratu.

Nia dehan, depois aban sei kontinua prosesu SNAEM ho Hospital Referal sira, sei kontinua ba iha servisu munisipal, depois ida nee kontinua ba iha servisu sentrais husi MS nia nomos INFPM nee rasik.

“Husi numeru 229 neebe mak koloka ba iha HNGV, nee kompostu husi mediku nain 10, parteira nain 20, infermeiru 110 nomos tekniku aliadu sira neebe apoiu mak hanesan farmasia dentaria, laboratorium nomos sira seluk tan,” dehan nia ba jornalista sira iha salaun Institutu Nasional Farmasia Produtu Mediku (INFPM) Kampu Alor, Kuarta (24/01/2024).

Iha fatin hanesan, Diretora Ezekutiva HNGV, Cecilia Barros Mendonça informa, agradese ba ekipa juri neebe mak durante nee ho nia esforsu, maski hasoru dezafiu no difikuldade oin-oin, maibe nafatin ho esforsu tomak, mak ohin bele iha ona rezultadu, no entrega ona ba rekursus umanus hodi bele atende servisu iha HNGV nian.

“Hau lori HNGV nia naran ho konselhu tomak la haluha hatoo agradese ba prezidente juri ho nia ekipa tomak durante nee, ba kandidatu sira neebe mak admitidu ona iha prosesu rekrutamentu ida nee, hau nia bemvindu ba imi hotu, neebe mak pasa iha rekrutamentu nee rasik,” tenik nia.

Nia afirma, prosesu sira nee imi mak aplay rasik vaga, ho vontade rasik atu sai funsionariu ba HNGV.

“No hau husu ba ita boot sira atu iha responsabilidade tomak hodi servi ba moras sira iha HNGV, servisu hanesan ekipa hodi fo atendimentu neebe mak kualidade iha HNGV, tanba nee husu ba ita hotu, servisu ho ekipa nee importante tebes, nomos disiplina servisu ba ita hotu,” katak nia.

Nunee Ekipa Integradu Ministeriu Saude, portavos Vidal de Jesus Lopes informa, rekursus umanus nee HNGV hotu ona.

“Neebe ohin entrega ona ba konselhu dirativa HNGV, nunee sira halo servisu atendimentu iha HNGV, tanba kandidatu nain 229 mak liu ona vaga HNGV nian,” hakotu nia.

(nat)

LEAVE A REPLY

Please enter your comment!
Please enter your name here