Ema Moras Mental Iha Direitu Ba Saude

Diretor Organizasaun non Govermental Psychosocial Recovery and Development In East Timor (PRADET), Manuel dos Santos hatete, nesesariu tebes atu harii sentru internamentu ba moras mental, hodi fo tratamentu neebe integradu ba pasiente, tanba taxa moras mental iha rai laran aumenta makas. (Foto Ilustrasaun: GSE)

DILI, STLNEWS.co – Diretor Organizasaun non Govermental Psychosocial Recovery and Development In East Timor (PRADET), Manuel dos Santos hatete, nesesariu tebes atu harii sentru internamentu ba moras mental, hodi fo tratamentu neebe integradu ba pasiente, tanba taxa moras mental iha rai laran aumenta makas.

Nia dehan, estadu no governu seidauk fo protesaun no atensaun neebe dignu ba ema sira neebe ho problema mental, tanba sira sei hetan diskriminasaun no violensia husi familia no sosiedade.

“Ita nia estadu no governu seidauk halo investimentu maximu no seidauk fo prioridade ba area saúde mental iha rai laran. Servisu sira atendimentu saude mental lao, maibe tuir ami nai hare presiza taan investimentu ba infrastuktura no rekursu humanu,” hateten nia ba jornalista sira, iha nia knaar fatin, Kuarta (16/12/2020).

Nia dehan, durante tinan barak servisu saude mental hetan apoia makas husi doador sira, tanba sira konsidera nee problema saúde publika ida neebe seriu no presiza atensaun maximu.

Governu ho apoia parseiru sira harii ona sentru agudu iha hospital nasional, maibe atu halo deit intervensaun ba kazu sira neebe emerjensia tanba nee presiza halo investimentu ba infrastruktura hanesan iha Laclubar hodi bele fo tratamentu neebe apropriado no dignu ba pasiente sira.

“Governu presiza fo tan bolsu estudu ba mediku timor oan sira atu bele hasai tan kursu espesialista pisikiatria. Ita mos iha sikologista Timor oan sira neebe remata estudu iha rai balun utiliza sira iha fasilidade saude sira atu apoia servisu atendimentu saude mental nian husi aspeitu sikologia,” nia dehan.*

Reportajen: Jeniche da Costa
Editora: Carme Ximenes

LEAVE A REPLY

Please enter your comment!
Please enter your name here