DILI, STLNEWS.co – Planu governu hakarak Timor tenki livre husi Covid-19, tanba nee governu kria kooperasaun ho universitariu iha Timor laran inklui Universidade Dili (UNDIL) atu implementa vasinasaun ba estudante sira.
Lia hirak nee hatoo husi Estevão da Costa Belo, Prezidente Fundasaun Boakril Universidade Dili (UNDIL) ba STL iha nia knaar fatin UNDIL, Maskarenhas, Dili, Tersa (12/04/2022).
“Nee planu governu nian atu halo vasinasaun ba universidade hotu – hotu, agora nee halo iha UNDIL,” dehan nia.
Prezidente Fundasaun UNDIL nee hatete, planu husi governu nian nee numeru vasinasaun tenki atinji 70%, tanba nee maka governu kria kooperasaun ho universidade atu implementa vasinasaun ba estudante universidade.
Entretantu, Estaudante UNDIL, Gaspar Freitas Ximenes da Silva katak, nia senti kontenti bele hola parte iha vasinasaun nee, tanba hakarak livre husi Covid-19.
“Hau senti kontenti bele simu vasina segundu doze (Booster), tanba nee hau husu ba kolega estudante UNDIL lalika tauk no hanoin barak konaba boatus neebe fo sai katak, vasina sei estraga ita, tan nee atu hatete deit katak, hakarak livre husi Covid-19 tenki simu vasina,” dehan nia.
(cri)
