F-FDTL Prontu Simu Vasina Dahuluk

Membru Falintil-Forsa Defeza Timor Leste (F-FDTL), prontu atu simu vasinasaun dahuluk, husi Ministeriu Saude ba prevensaun kombate Covid-19. (Foto: STL/Claudios de Jesus)

DILI, STLNEWS.co – Membru Falintil-Forsa Defeza Timor Leste (F-FDTL), prontu atu simu vasinasaun dahuluk, husi Ministeriu Saude ba prevensaun kombate Covid-19.

Informasaun nee hatoo hosi, Xefe Estadu Maior Jeneral F-FDTL, Coronel Calisto Santos “Coliati” ba jornalista sira iha Kuarter Jerál F-FDTL Fatuhada, Dili, Tersa (23/02/2021).

Nia fo razaun katak membru F-FDTL prontu simu vasina dahuluk, tanba konsidera hanesan importante ba saude hodi prevene moras Corona.

“Sem duvida militar sempre prontu kualker hora, tanba vasina nee importante tebes,” dehan Coliati.

Nia dehan hanesan ema hotu hatene katak moras corona ida nee, sai preokupasaun ba ema iha mundu tomak. Tanba ne’e liu husi kooperasaun Ministeriu Saude hamutuk ho WHO/OMS, realiza sosializasaun ba membru militar sira, oinsa atu komprende didiak konaba halo prevensaun liu hosi vasinasaun nee.

Coliati hatutan husi advokasia nee bele fo hatene ba militar sira para atu komprende didiak konaba programa estadu nian konaba vasina.

Iha parte seluk reprezentante hosi Ministeriu Saude, ofisial programa imunizasaun, Manuel Mausiri hatete, forsa sira hanesan F-FDTL ho Polisia konsidera hanesan parte ida importante, oinsa atu salva saude.

Tanba nee presiza tebes simu vasinasaun nee, nunee bele sai ezemplu ba sosiedade sira oinsa hatene no kumpre regra WHO/OMS nian.

“Informasaun globalmente konaba moras Covid-19, tanba ita fiar ka lafiar kondisaun sira ne’e sei lori ita ba realidade kuandu ita la halo prevensaun agora,” dehan reprezentante Ministeriu Saude nee.*

Reportajen: Claudios de Jesus
Editora: Carme Ximenes

LEAVE A REPLY

Please enter your comment!
Please enter your name here