DILI, STLNEWS.co – Parte husi forensik entrega ona mate isin Nilton da Costa ba familia matebian.
“Mate isin Nilton da Costa autopsia hotu ona no parte forensik entrega ona ba familia matebian,” lia hirak nee hatoo husi Xefi Departamentu Forensik iha Hospital Nasional Guido Valadares (HNGV), Nilton Tilman ba jornalista iha nia knaar fatin, Tersa nee (21/03/2023).
Nia hatutan, mate isin nee halao operasaun iha tuku 10 liu no remata ona iha tuku 1 resin, neebe mate isin nee entrega tiha ona ba familia.
Matebian nia aman Eduardo da Costa hatete, antes nee sira problema ruma laiha, maibe akontese ona hanesan nee lei mak sei desidi.
“Ami husi familia nia ezijensia nee kazu nee tenki ba oin, para ita labele husik kriminozu sira hanesan nee, no ami familia prontu atu halo autopsia ba matebian nia mate isin,” tenik nia.
Hanesan aman la haree ho matan, maibe tuir informasaun neebe mak iha nee problema hun nee husi feto duni, maibe rejultadu nee sei hein investigasaun mak foin hatene lo-loos ninia kronolojia.
Tuir observasaun neebe mak STL haree iha terenu katak, matebian ohin entrega ona ba familia, no akompanha mos husi parte seguransa hodi ba too iha ninia hela fatin Bekora, hodi halo funebre tuir tradisaun kultura Timor nian.
(nat)
