Futuru Selesaun Jogador Nasional, Laos Deit Iha Dili

Federasaun Futebol Timor Leste (FFTL) nia planu, iha futuru sei halo selesaun ba jogador nasional iha Timor Leste laos deit iha Dili, maibe sei halo mos ba iha munisipiu sira. (Foto: STL/Crisogono Magalhães)

DILI,STLNEWS.co– Federasaun Futebol Timor Leste (FFTL) nia planu, iha futuru sei halo selesaun ba jogador nasional iha Timor Leste laos deit iha Dili, maibe sei halo mos ba iha munisipiu sira.

“Ita nia planu estratejiku FFTL nian periodu 2018 ate 2022 hare mos ba estrutura federasaun, ami sei fokus atu lori futebol nee ba iha munisipiu planu para atu ba oin, selesaun Timor Leste laos iha deit Dili, selesaun Timor Leste mos inklui munisipiu sira hotu,” lia hirak nee hatoo husi Adjuntu Sekretariu Jeral FFTL, Frederico Martins ba STL iha nia knaar fatin FFTL, Dili, Tersa (26/01/2021).

Adjuntu nee informa, molok atu halo selesaun ba sira, antes nee tenke iha atividade ida para suporta sira nunee bele prepara sira aan, hodi bele tuir selesaun nasional. Agora dadaun nee atividade lao hotu ona komesa hahu husi munisipiu hotu, agora dadaun ita sei iha hela estadu emerejensia nia laran, neebe sira seidauk bele hahu treinamentu entaun espera katak fevereiru nee iha munisipiu sira halao ona sira nia atividade ba dezenvolvementu juvenil nia.

“Planu ba tinan ida nee sei fokus liu ba kompetisaun domestika no selesaun nasional neebe mak mensiona ona inklui mos treinamentu sira hanesan arbitrajen, Treinador neebe komesa hahu fali ona no mos ba atividade lubuk ida hanesan atividade ba juvenil sira sei halao iha munisipiu hotu, festival mos sei halao iha munisipiu hotu, agora dadaun munisipiu hotu preparadu ona atu implementa,”informa nia.

Nia hatete, agora dadaun asosiasaun sira kada munisipiu halo ona restruturasaun nee kuaze asosisaun sira halo hotu ona i balun kontinua mantem nafatin maibe ho estrutura neebe mak kompletu, Prezidente, Vice Prezidente iha mos membru ezekutivu iha neeba hare katak, sira iha kapasidade atu jere asosisaun sira nee, tanba ita hare katak atividade sira nee programadu hotu ona, entaun bele foo oportunidade mai federasaun para bele implementa atividade sira nee, bainhira dezenvolvimentu futebol juvenil iha Timor laran tomak nee lao ona, ita sei koalia ho asosisaun sira para foo apoiu orsamentu neebe mak FFTL foo kada fulan ba iha munisipiu tenta para atu loke fali akademia sentru treinamentu nee laos deit iha kapital maibe loke mos ba postu administrativu.*

Reportajen: Maria Tavares
Editor: Crisogono Magalhães

LEAVE A REPLY

Please enter your comment!
Please enter your name here