Governu Rezolve Ona Stok Aimoruk

DILI, STLNEWS.co – IX Governu liu husi Ministeriu Saude rezolve ona stok aimoruk neebé hotu, tanba aimoruk too ona iha Timor Leste, hein halo distribuisaun ba kada fasiidade.

Lia hirak nee hatoo husi Ministra Saude, Elia Amaral ba jornalista sira iha Hospital Nasional Guido Valadares (HNGV), bainhira akompanha Prezidente Republika Jose Ramos Horta Vizita HNGV, Tersa nee (19/12/2023).

Nia hatete, relasiona ho stok aimoruk hotu, ministra rasik hatoo ona iha plenaria.

Ministra dehan, los duni stok aimoruk momentu nia aprezenta iha plenaria relata mos katak simu pasta hanesan Ministra Saude iha fulan Julhu stok laiha tebes.

“Stok hotu nee liu tiha estandariza normalmente iha, ho ida nee IX Governu la nonok, maibe hamriik hodi nunee propoin kompra ho karakter urjente, propoin orsamentu ratifikativu US$ 6 milhoens, ita mos koopera tanba ho valor aas, koopera ho tribunal de kontas, agradese tribunal de kontas fo apoiu masimu ba ida nee, preokupasaun nasional presiza responde, ita boot sira durante nee akompanha hela iha loron tolu haat liu ba kuaze loron haat kompanhia hatama iha premeiru faze, kompanhia hatama ona aimoruk neebe ita boot sira preokupa,” katak ministra.

Nunee mos Prezidente Republika Jose Ramos Horta hatete, stok aimoruk, nia mos rona dala barak ona, maibe ida nee Ministra Saude mak iha kompetensia koalia ba ida nee.

“Ida nee diak liu ministra mak koalia ba ida nee, nee hau dala barak rona, no falta medikamentu ministra bele esplika ba ida nee,” katak PR Horta.

Tuir PR Horta nia observasaun ba iha HNGV kondisaun agora diak ona, tinan hira liu ba haree melhoria balun tinan 10 liu ba, agora diak ona, maibe Governu Estadu tenki tau osan.

“Estadu Governu tenki tau orsamentu boot liu tan para halo hospital ida neebe nivel Bali no Singapura, ita nasaun independente ita soberanu tinan 20 resin ona atu tama ASEAN tenki iha hospital modernu,” katak PR Horta.

(eme/nat/don)

LEAVE A REPLY

Please enter your comment!
Please enter your name here