DILI, STLNEWS.co – Relasiona ho rezidensia mediku Kubanu nian iha Hospital Nasional Guido Valadares (HNGV), sei iha prosesu nia laran.
“Atu hadia rezidensia Kubanu nian nee, iha prosesu nia laran, tanba IX Governu foin hahu iha fulan Julhu, neebe fazeadamente ami sei propoin ba iha preokupasaun sira nee,” tenik Ministra Saude, Elia dos Reis Amaral ba jornalista iha Portu Dili, Segunda (04/09/2023).
Nia haktuir, neebe buat hotu sei lao tuir fazeadamente, no sei iha prosesu nia laran, neebe saida mak Primeiru Ministru koalia nee sei too iha neeba.
Aleinde nee STL asesu husi pajina Palasiu da Sinzas nian nee katak, Primeiru Ministru Xanana Gusmão orienta Ministeriu tolu atu halo reabilitasaun ba rezidensia mediku iha HNGV.
“Primeiru-Ministru (PM) Kay Rala Xanana Gusmao orienta Ministeriu Obras Publika (MOP), Ministeriu Planeamentu Investimentu Estratejiku (MPIE) no Ministeriu Saude (MdS) atu halo reabilitasaun urjensia ba rezidensia mediku iha Hospital Nasional Guido Valadares (HNGV),” tenik nia.
Entretantu, rezidensia neebé sei reabilita mak rezidensia neebe utiliza husi Brigada mediku Kubanu durante nee, konstrui dezde Indonezia nia tempu ho kondisaun ladun diak ona. Moru protesaun, plafond, kalen no seluk-seluk tan iha kondisaun aat.
“Ita presiza hadia urjensia hodi fasilita dotor sira bele hela ho diak,” dehan PM Xanana.
Nia afirma, uma hamutuk tolu (3) inklui kobi house rua (2) tuir planu sei prosesa iha semana oin ho karater urjente.*
