Halibur Malu Liu 10, Tama Prizaun. Inocencio: Nee La Loos

Program officer Asia Justice and Rights (AJAR), Inocencio Xavier. (Foto: STL/Santina Castro)

DILI, STLNEWS.co – Dekretu governu neebe fo sai katak, ema neebe halibur malu husi nain 10 sei tama prizaun preventiva durante tinan 3, nee laloos, tanba Covid-19 laos akontese iha Timor Leste.

Program Officer ASIA Justice and Rights (AJAR), Inocencio Xavier hatete, kona ba regras ida neebe dehan katak halibur malu liu nain 10 tama prizaun durante tinan 3, oinsa iha merkadu sira governu sira garante katak lahalibur malu to sanulu, agora ida neebe los maka governu sira hakarak prefere tenki koalia klaru, hanesan eskola sira nee laos ema nain sanulu deit maibe barak, serake eskola bele kontinua ho ema nain sanulu.

“Hau hanoin lei sira hanesan nee presiza hare, karik hau konkorda tau lei nee ba sira neebe maka tama sai ilegalmente husi fronteira portu no aeroportu neebe maka kontra bandu nee, maibe sira neebe maka iha rai laran nee ita tenke haruka tama hotu prizaun, nee laloos tanba COVID-19 nee laos akontese iha Timor, ema lori husi rai liur maka mai,” dehan nia ba STL, iha nia knaar fatin Farol, Dili, Segunda (04/01/2021).

Nia hatuan, ba sira neebe maka tama ilegalemente husi fronteira portu no aeroportu maka fo sansaun ba sira no fo hotu kastigu ba sira, maibe laos ida neebe maka buka moris atu fo sansaun, hanoin lei nee laiha estudu ida neebe klean.
“Ba hau lei nee hanesan prematur demais, tanba tuir lolos nee sira kriminaliza fo sansaun nee ba ema sira neebe maka iha liur tama mai nee, tanba iha tempu estadu emerjensia ema taka fronteira portu no aeroportu maibe sira kontinua tama, ida nee maka fo kastigu tanba sira maka lori moras aat nee mai,” dehan nia.

Inocencio kestiona, laos ema neebe halo tos halo natar, halo kultura uma lisan husu matak malirin, nee maka ba kriminaliza hotu, no fo kastigu prizaun preventiva tinan 3 hotu, nee deputadu sira neebe halo lei nee larefleta, inklui governu lahalo estudu “lufulafu” deit.

“Hau hare lei nee larefleta ba situasaun, hau nia sujestaun maka nee lei nee atu bele asegura no fo todan kastigu ba ema sira neebe maka tama sai fronteira ilegalmente, tanba estadu bandu maibe sira kontinua tama ilegal, no inklui ajente estadu sira neebe maka fasilita ema sai tama, ida nee maka tenke fo todan dobru ida nee ita aseita,” Inocencio afirma.*

Reportajen: Santina Castro
Editora: Carme Ximenes

LEAVE A REPLY

Please enter your comment!
Please enter your name here