HNGV Hasoru Problema Barak, Maibe Nafatin Halo Atendimentu

DILI, STLNEWS.co – Hospital Nasional Guido Valadares (HNGV) hasoru problema barak mak hanesan aimoruk laiha, rekursus umanus menus, nomos espasu limitadu, maibe nafatin halo atendimentu ba pasiente sira.

Kestaun nee hatoo husi Diretor Klinika HNGV, Marcelino Correia ba jornalista sira iha HNGV, Kinta (11/01/2024).

Nia dehan, bainhira aimoruk laiha, nee hakarak fo hanoin ba malu, oinsa para bele iha kooperasaun atu nunee bele halo servisu nee diak liu tan, tanba nee mak stok aimoruk laiha, konsumaves no reajente nee hospital sempre komunika ho parte relevante hanesan INFPM. Kuandu aimoruk laiha nee prejudika ba iha atendimentu, atu haruka pasiente sira hola aimoruk iha liur mos hanoin, tanba ema ho kbiit laek.

“Aimoruk laiha, no ho situasaun ida agora hospital mos espasu laiha, tanba agora nee pediatria nakonu, fatin atu tau moras mos laiha. Neebe agora komunika hela ho Sentru Saude Vera Cruz para muda pasiente balun iha nee ba Vera Cruz, tanba emerjensia nakonu, pediatria mos nakonu. Neebe buat barak sei problema iha hospital nee para atu hadia, depois rekursus mos menus, tanba rekursus barak mak la tama servisu, tanba kontratu remata, neebe sai obstaklu iha HNGV nee para atu hadia,” dehan nia.

Nia katak, maibe atendimentu kontinua lao ho forsa no kbiit neebe mak iha, atu nunee se deit mak mai halo atendimentu nafatin, ida nee mak ita nia knaar hanesan profisional saude, neebe ita sei lases husi problema sira nee hotu.

Profisional saude sira neebe mak nia kontratu remata ona nee hamutuk 304 pesoal, husi numeru nee inklui mediku, infermeiru, parteira, kliner, seguransa balun nomos sira neebe mak apoiu lojistika sira nee. No uluk nee total pesoal saude hamutuk 2.000 resin.

(nat)

LEAVE A REPLY

Please enter your comment!
Please enter your name here