DILI, STLNEWS.co – Hospital Nasional Guido Valadares (HNGV) kontinua rejistu kazu dengue durante Marsu ho Abril nia laran.
Tuir Xefi Departamentu Emerjensia HNGV, Eldegar Lopes Martins katak, depois iha mos kazu dengue, tanba dengue nee sai nafatin ita nia preokupasaun iha fulan rua ikus nee.
“Sira neebe baixa ho kazu dengue ba iha ema ho adultu durante iha fulan rua nee nain 50, husi kazu sira nee baixa ba iha pediatria hamutuk 124,” dehan nia iha HNGV, Segunda nee (08/05/2023).
Nia dehan, sira neebe mak dengue, depois mai halo observasaun iha nee, maibe haree ba ninia situasaun la kritiku no kondisaun diak hela nee hamutuk nain 5. No sira neebe dehan dengue halo observa ka hasai raan mak haree, nee posibilidade dengue ka lae, nee iha 138, nee iha departamentu emerjensia.
Iha fatin ketak, Diretora Servisu Saude Munisipiu Dili, Agustinha Segurado informa, hahu husi Janeiru too mai Abril nee Servisu Saude Munisipiu Dili rejistu kazu dengue hamutuk 641 kazu no mate nain 3.
“Dengue husi Janeiru too mai agora iha 641, husi numeru ida nee nain 3 mak lakon vida, nee rejistu husi vijilansia saude Munisipiu Dili nia, area kontrolu nee mak mai husi klinika privadu sira nomos maternidade fatumeta inklui Klinika Bairo Pite no privadu sira seluk. Hau hakarak sublinha oituan ba hotu-hotu katak, prevensaun nee mai husi ita rasik, prevensaun dengue laos foun ba ita Timor, nia prevensaun nee simples los se ita hotu uza konsiensia labele halo kimiku,” dehan nia.
Nia afirma, atu halakon moras nee tenki hakohi kalen aat, hamoos bazu aifunan nian no fatin bee nalihun, ida nee konsiensia atu halo prevensaun.
(nat)
