HNGV Selebra Loron Mundial Ba Ema Moras

DILI, STLNEWS.co – Hospital Nasional Guido Valadares (HNGV) selebra loron mundial ba ema moras sira ba dala 32, ho tema “laos diak ema hela mesak, kuidadu ema moras no kuidadu relasaun”.

Diretora Ezekutiva HNGV, Cecilia Barros Mendonça dehan, ho tema selebrasaun ida nee mak ema ida sei la konfortavel bainhira nia moris mesak, maibe presiza ema seluk nia tulun.

“Ho tema ida nee mai ita pesoal saude sira, ita nia prezensa importante tebes ba pasiente sira neebe iha HNGV, tanba pasiente sira presiza tebes ita nia akompanhamentu neebe masimu hodi fo kuidadu ho dignu no seguru, atu nunee labele husik moras ida mesak, tulun sira ho fuan no domin atu sira bele senti katak ita nia prezensa nee folin liu ba sira, duke aimoruk no ekipamentu neebe ba avansadu ona,” dehan nia iha HNGV, Segunda (12/02/2024).

Nia afirma, ho ida nee HNGV agradese tebes ba mediku espesialista no mediku jeral sira, enfermeiru, parteira no tekniku aliadu sira hotu nia servisu diak hodi hatudu katak, pasiente barak mak hetan ona salvasaun husi HNGV, maski sira sei enfrenta hela dezafiu oin-oin.

Nia afirma, HNGV fo prezente ba pasiente sira hamutuk 400 prezente iha HNGV, no la konta ho iha sala emerjensia.

Aleinde Visi Ministru Saude ba Fortalesimentu Instituisional, Jose dos Reis Magno informa, buat balun halo ona, tanba nee ohin HNGV sei hamriik hela.

“Maibe ezijensia ita nia maun alin sira neebe oras hetan hela moras iha HNGV nee, kontinua ezijensia ba ita nia profisional saude atu mantein nafatin ita ninia servisu tomak, karik sira nesesita ita sempre prontu hodi oferese kuidadu saude neebe sira prezisa. Iha nivel hotu-hotu kuidadu saude sekundariu no terseira nian, no la haluha ba iha primaria iha munisipiu,” hatete nia.

Nia mos afirma, nunee Ministeriu Saude ezije nafatin ba hotu-hotu atu ba oin tenki servisu ho ekipa, nunee kuidadu saude oferese tan ba sira nakonu ho kompaisaun, pasiensia no ditadura, ida nee importante.

Nia akresenta, tanba nee ba profisional pesoal saude sira hotu iha HNGV no iha teritoriu nasional tomak.

(nat)

LEAVE A REPLY

Please enter your comment!
Please enter your name here