DILI,STLNEWS.co – Diretor Klinika Hospital Nasional Guido Valadares (HNGV), Marcelino Correia informa, iha ospital nee ahi sempre mate lakan.
“HNGV ita sempre enfrenta ahi mate lakan, liu-liu iha tempu neebe mak halo atendimentu ba iha moras sira, tanba nee mak hospital nee iha jerador neebe mak rezerva, kuandu problema ahi mate, entaun automatikamente jerador mak sei funsiona fila-fali,” dehan nia ba jornalista iha HNGV, Tersa (29/08/2023).
Nia afirma, mezmu jerador nee nia forsa la too, maibe utiliza deit ba fatin sira neebe mak vital ka fatin sira neebe mak importante, mak hanesan sala operasaun, ICU nomos ba emerjensia, fatin sira nee mak kontinua asegura ho jerador neebe mak iha, bainhira akontese ahi mate.
Nia haktuir, jerador sira nee forsa la too, iha jerador boot ida maibe jerador nee tuan no kondisaun mos ladun diak neebe la uza.
“Agora ami koko hela atu koalia ho EDTL para atu tur hamutuk atu dada ahi nee mai iha HNGV nee linha rua, nee para linha ida ahi mate karik, linha ida funsiona nafatin, neebe ida nee sei iha prosesu hela,” hakotu nia.
(nat)
