DILI, STLNEWS.co – Hospital Nasiona Guido Valadares (HNGV) utiliza ICU movel hodi fo baixa ba pasiente sira.
“Ita loke tan ICU movel hodi tau tan moras sira iha neeba, tanba fatin laiha ona, entaun ita nia labarik sira neebe mak sofre moras sintina fatin laiha, i espesialista sira husi Australia iha nee hela hodi halo operasaun ba labarik sira nee, no sira nee iha ICU Movel,” dehan Diretor Klinika HNGV, Marcelino Correia ba jornalista iha HNGV, Tersa (08/08/2023).
NIa hatete, hakarak ka lakohi tenki muda ba hodi toba iha ICU movel nee, too aban bainrua mak normaliza fila fali mak sira bele muda fali ba iha sirujia nian. Tanba agora fatin la too atu baixa pasiente sira, entaun utiliza hotu ICU movel hodi fo baixa ba pasiente sira.
Aleinde nee, Xefi Departamentu Kuidadus Intesivu (ICU), Vidal de Jesus Lopes informa, agora daudaun ICU movel mos utiliza hotu ona hodi fo baixa pasiente sira.
“Haree ba fatin limitadu, entaun pasiente sira bele baixa iha ICU movel nia laran para hetan tratamentu,” hatete nia.
Visi Ministru Saude ba Operasionalizasaun Ospital, Flavio Brandão informa, HNGV uluk too mai agora espasu iha nee nafatin deit.
Ba oin HNGV bele presta diak liu tan, no hetan fali konfiansa husi nia sidadaun tomak, i sira kompremitivu katak, ba oin primeiru tenki konsiente katak, problema sira neebe mak akontese, no neebe mak sai lamentasaun publiku. Ida nee problema neebe mak HNGV hatene solusiona nia problema.
Nia haktuir, neebe fiar katak, HNGV kompremitidu para atu haree oinsa mak asistensia ida diak liu mai hospitalidade, iha neeba iha mediku, infermeiru no parteira sira sei halo prestasaun neebe mak atu hetan fali konfiansa, no restaura fila-fali konfiansa povu nian.
(nat)
