Inocencio: Atitude MS Laeduka Povu

Foto: Espesial

DILI, STLNEWS.co – Sosiadade sivil iha rai laran konsidera atitude Ministra Saude, Maria Odete Freitas Belo laeduka povu, tanba la respeita lei neebe governu produs.

Kestaun nee Officer ASIA Justice and Rights (AJAR), Inocencio Xavier, hatoo relasaun ho imajen neebe viral iha publiku, konaba Ministra Saude, Maria Odete Freitas Belo, neebe halao vizita ba munisipiu Covalima lauza maskra.

Nia dehan, atitude neebe Ministra Saude rasik hatudu, ida nee signifika larespeita ba lei neebe sira produs no laeduka publiku.

“Ho hahalok ida nee hatudu katak Ministra laobedese ba lei no larespeita lei neebe maka sira produs, liuliu dekretu lei ba serka sanitaria iha munisipiu Covalima no laeduka publiku,” dehan nia ba STL, liu husi telefone, Tersa (09/03/2021).

Nia dehan, governu sira obriga sidadaun hotu hotu tenke uza maskra no uza ekipamentu ba prevensaun Covid-19 nian, maibe Ministra Saude rasik lao hanesan pasiar no lao hanesan ba festa.

“Hau hanoin ida nee mosu perguntas barak ba ema, los duni klae Covid-19 maka mosu duni iha Suai ka ou lae, see Covid-19 nusa maka Ministra rasik lauza ekipamentu prevensaun nian,”dehan nia.

Inocencio kestiona serake ministra iha ona imunidade neebe forsa hodi hasoru moras nee, tanba nee mosu duvida ba publiku kona ba atitude hanesan nee.

“Hau rasik lamenta teb-tebes ho atitude Ministra Saude nian, tanba lahatudu ezemplu ba populasaun sira, ezije populasaun, maibe sira rasik lakumpri,” Inocencio kestiona.

Nia hatutan, Primeiru Ministru tenke hare ba atitude nee, tanba hare ba situasaun uluk Ministra Elia rasik iha aeroportu fahe maskra ba ema, no haruka ema fase liman, maibe Ministra rasik lauza maskra, tanba nee sai hanesan preokupasaun ema nian.

Notisias nee STL hatun seidauk hetan konfirmasaun husi parte Ministra Saude, Odete Freitas Belo.

Reportajen: Santina Cardoso
Editora: Carme Ximenes

LEAVE A REPLY

Please enter your comment!
Please enter your name here