ISPA Aas Iha Ermera

Ministra Saude (MS) Odete Maria Freitas Belo hatete, oras nee moras ISPA numeru aas iha munisipiu Ermera. (Foto: MS)

ERMERA, STLNEWS.co – Ministra Saude (MS) Odete Maria Freitas Belo hatete, oras nee moras ISPA numeru aas iha munisipiu Ermera.

Ministra hatete bazeia ba kondisaun populasaun munisípiu Ermera neebe ladun fo atensaun ba labarik sira, maka moras infeksaun respiratoriu (ISPA) kontinua aas iha munisípiu Ermera.

Ministra Saude (MS) Odete Maria Freitas Belo ba jornalista bainhira akompanha ho Prezidente Republika nia vizita Iha Munisipiu Ermera Kuarta (18/11/2020).

Ministra dehan tanba laiha atensaun masimu husi inan-aman ba oan sira, mak ISPA afeta ba labarik sira, inklui mos liu husi hahan.

“Bazeia ba relatoriu neebe mai husi diretor saude munisípiu nian katak, moras neebe numeru kontinua aas iha Munisípiu Ermera, tanba ita-nia moris rasik depois liga mos ba diagnostika no alerjia sira, udan inklui klima neebé iha,” dehan MS Odete.

Ministra dehan, moras ISPA nee barak liu mak afeta ba labarik sira, tanba laiha atensaun masimu husi inan-aman sira.

“Labarik kiik-oan mak barak liu, depois moras ISPA nee hanesan alerjia no seluk tan. Tanba nee ita la presiza anti biotiku maibe presiza mak deskansa barak, hemu bee barak. Maibe iha mos kazu balun neebe laiha tratamentu maka bele monu ba moras neebe susar liu,” Ministra Esplika.

Governante nee husu ba inan-aman sira atu kuidadu oan sira iha uma no estrada publiku, tanba dalaruma labarik sira halimar ba mai la uza xinelus no inan-aman la tau atensaun makaas ba oan sira iha momentu neebe rai rahun barak.

Ministra mos hare katak, dezenvolvimentu sira iha munsípiu Ermera diak, Ministriu Saude mos iha planu atu harii tan sentru saude tolu iha Ermera inklui eleva mos sentru saude sira neebe iha, tanba hare ba populasaun ermera neebe aas.

Nunee mos Numeru populasaun Ermera neebe aas, entaun sira eleva liutan saude munisípiu nian para bele atende ba populasaun sira iha munsípiu ida nee.

Ministra mos dehan, iha planu 2021 nian, governu liu-liu Ministeriu Saude sei konstrui tan postu saude husi 11 too 19 iha teritoriu Timor-Leste.

“Orsamentu Jeral Estadu 2020 nian ita la fo prioridade ba kontrusaun, maibe iha orsamentu 2021 nian sei aloka balun ba konstrui postu saude iha munisipiu sira kuaze 11 too 19 inklui halo rezidensia ba parteira sira nomos manutensaun ba postu saude iha munisípiu balun neebe governu identifika ona, tanba ita mos aloka iha kapital minor, bens servisu hodi halo manutensaun postu saude sira,” nia hatutan.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here