Janeiru-Outubru SSVC Rejistu Kazu Dengue 147

DILI, STLNEWS.co – Hahu iha fulan Janeiru too iha fulan Outubru Sentru Saude Vera Cruz (SSVC) rejistu kazu dengue hamutuk 147.

“Dadus dengue neebe mak Sentru Saude Vera Cruz relata husi fulan Janeiru too mai iha fulan Outubru tinan ida nee hamutuk 147, husi numeru iha pasiente moderadu, leve nomos severu,” dehan Xefi Departamentu Marilia Piedade ba jornalista iha Vera Cruz, Segunda (04/12/2023).

Nia dehan, pasiente neebe mak kazu dengue baixa iha sentru saude nee ho kazu leve ho moderadu deit, kuandu kazu severu haruka ba iha Hospital Nasional Guido Valadares (HNGV).

“Agora daudaun udan monu rai nee sempre mosu kazu dengue, laos ba tinan ida nee deit, maibe tinan-tinan sempre mosu, entaun ami iha inisiativa atu halo promosaun no tratamentu,” dehan nia.

Promosaun mak agora daudaun lao iha loron Sesta nee, iha orariu ida halo promosaun ba iha kada aldeia no suku atu halo promosaun, atu nunee komunidade hatene oinsa, atu halo prevensaun ba moras dengue rasik.

Nia haktuir, depois iha nee mos responsabilidade promosaun saude iha fulan tolu liu ba sira fahe hela abate ba kada uma kain idak-idak nomos halo fomigasaun ba iha fatin risku sira.

(nat)

LEAVE A REPLY

Please enter your comment!
Please enter your name here