DILI, STLNEWS.co – Tuir dadus iha fulan Julhu, Sentru Saude Vera Cruz (SSV) rejistu labarik sira ho malnutrisaun baziea ba nia idade ho todan hamutuk 111.
“Dadus neebe mak ami rekolha hahu husi fulan Julhu nian, konaba labarik sira neebe mak malnutrisaun, nee bazeia ba labarik nia idade ho todan, entaun iha fulan Julhu nia laran nee rejistu labarik hamutuk 111,” lia hirak nee hatoo husi responsavel nutrisaun iha Sentru Saude Vera Cruz, Antonio da Cruz ba jornalistansira, Segunda (14/08/2023).
Nia afirma, depois ba labarik neebe sukat iha liman kabun leten mak deteta labarik nee iha malnutrisaun, iha fulan Julhu nee iha nain 25, labarik sira neebe mak hetan malnutrisaun nee fo planpinat, maibe agora laiha, entaun fo akonselamentu deit, oinsa atu prepara ai haan.
Nia dehan, komunidade sira iha Dili nee sira asesu ai haan husi merkadu, tanba moris iha Dili nee toos laiha, se sira balun iha rai entaun sira bele kuda modo no hakiak manu sira, hodi nunee sira bele prepara ai haan neebe mak diak.
Nia husu ba inan sira tenki promove produtu lokal, labele hein suplementu planpinat nee labele rezolve problema, tanba loron ba loron nesesidade nutrisaun lao hela.
“Neebe ami reforsa iha akonselamentu ba iha labarik sira neebe mak iha malnutrisaun, para inan sira iha konhesimentu diak, para bele prepara ai haan ho kualidade, atu nunee labarik sira bele konsumu ho diak, para bainhira mai tetu nee nia todan bele sae,” tenik nia.
Nia afirma, labarik sira neebe mak hetan malnutrisaun moderadu iha nain 20, entre feto ho mane, maibe malnutrisaun neebe grave iha nain 5 nee tuir indikador ida sukat liman kabun leten.
Iha fatin hanesan, Aman Nelson Moniz hatete, ohin mai iha Sentru Saude Vera Cruz nee bazeia ba rekomenda husi infermeiru sira.
“Hau lori hau nia oan mai konsulta, tanba husi infermeiru sira dehan, fulan-fulan tenki lori ita nia oan mai atu check up, nunee haree nia kondisaun no nia nutrisaun, depois ho nia pezu,” hatete nia.
Nia haktuir, entaun hanesan inan aman tenki lori mai Sentru Saude Vera cruz, maibe ohin lori mai nee tanba labarik isin manas, lori tetu no konsulta simu aimoruk.
Nia dehan, infermeiru sira hatete katak, maski moras maibe nia kondisaun diak hela, no nia todan mos diak hela.
(nat)
