DILI, STLNEWS.co – Fulan Junhu Klinika Bairo Pite rejistu kazu Infesaun Respiratória Aguda (IRA ka sigla indonézia ISPA) hamutuk 467 pasiente.
“Moras neebe aas liu mak ISPA, kada fulan besik 20% neebe rejista iha Sentru Saude Bairo Pite. Total kazu ISPA iha fulan Junhu hamutuk 467 mak nafatin rejistu aas,” dehan Diretor Klinika Bairo Pite, Inácio dos Santos ba jornalista iha Klinika Bairo Pite, Kuarta (05/07/2023).
Nia afirma, iha fulan Junhu total kazu neebe iha 477, fulan Maiu besik 300 resin. Total kazu husi fulan 2 kuaze 8 mil ital, 20% mak rejistu kazu ISPA.
Nia akresenta, kazu ISPA maioria afeta ba labarik kiik oan sira, no iha mos ema boot, maibe maioria afeta ba labarik kiik oan sira, liu-liu ba idade 10 mai kraik.
Atendimentu laiha problema, ekipamentus sufisiente, mediku agora nain 7 inklui mediku Cubano nain rua neebe voluntariamente suporta iha nee, neebe laiha problema, no atendimentu ba ISPA laiha infesaun mai ho grave husi numeru neebe mensiona nee. Sira rekupera diak haruka fila ba uma, depois tratamentu ambulatoriu deit, no halo monitorizasaun, loron rua ka tolu haruka fila mai konsulta, depois pasa aimoruk.
“Husi ISPA kauza mai husi klima, iha publiku estrada nakonu ho rai rahun, iha tempu udan tahu sira ba estrada laran, tempu bailoron tahu sira maran entaun sirkulasaun transporte tun sae, rai rahun sae, entaun bele kria infesaun respirasaun, tanba rai rahun neebe sirkula ba kontamina ho virus ka bakteria neebe iha husi rai nee infeksaun ba ita nia sistema respirasaun,” dehan nia.
Nia afirma, iha populasaun barak seidauk iha konsiensia, ema barak fuma iha fatin publiku sira, i la konsiensia atu bele evita halo iritasaun ba ema nia pulmaun.
Nia akresenta, kuandu hetan sintomas sinais sira tenki mai kedas fasilidade saude, para hetan atendimentu husi mediku sira, tanba infeksaun respiratoriu la signifiaka la perigu, maibe dala ruma ba labarik kiik sira bele perigu, bainhira longu prazu halo tratamentu bele kria mos pneumonia nee fo risku ba labarik kiik.
(nat)
