DILI, STLNEWS.co – Total kareta ambulansia oras nee daudaun iha 53, maibe ida neebe kondisaun diak iha 25 mak funsiona.
Lia hirak hatoo husi Diretor Jeral Servisu Nasional Ambulansia no Emerjensia Medika (SNAEM), Horacio Sarmento katak, total ambulansia hamutuk 53, maibe kareta ambulansia 20 mak aat no labele hadia.
“Ida nee ami atu entrega hela ba patrimoniu estadu, balun aat liu ona mak ba soe iha fatin patrimoniu estadu nian. Iha kareta 8 deit mak aat, maibe bele hadia. Agora ambulansia neebe mak ho kondisaun diak nee iha 25, nee kobre hotu munisipiu sira, maibe iha munisipiu sira nee iha ambulansia ida-ida deit,” dehan ba STL iha knar fatin Kaikoli, Sesta (25/08/2023).
Nia afirma, konaba kareta sira neebe mak aat nee, iha hela kontratu ofisina sei halo retein dala hira ona, maibe seidauk iha kompanhia ida mak manan.
“Ami nia ofisina neebe mak iha, agora ami buka meus atu sosa pexa kareta nia para bele rezolve mesak, neebe agora ambulansia 8 nee balun hadia diak ona, hodi fila-fali ba iha munisipiu para tula pasiente,” nia tenik.
Ambulansia iha Same laiha, tanba foin daudaun tula pasiente mak mout iha mota laran, oras nee sei aat hela. Neebe tula pasiente nee ambulansia multifunsaun mak tula deit.
Agora iha munisipiu sira seluk nee iha ambulansia ida rua deit, maibe karik loron ida mak pasiente nain rua ka tolu, nee husi Dili mak ba apoiu no munisipiu sira seluk nian mos apoiu malu.
“Maski ambulansia limitadu, maibe ami nia koordenasaun ho parte relevante sira lao hela, laiha ida mak ami husik ba kotuk atu latula nee lae, ” katak nia.
Iha Orsamentu Retifikativu propoin duni atu hola tan ambulansia 5, maibe diskusaun iha Ministeriu Saude rasik la autoriza, tanba proposta barak liu, entaun kansela fali hodi propoin fali ba orsamentu tinan 2024 nian.
Tanba Banku Mundial mos dehan atu sosa 5 ka 6 ba MS, kareta ambulansia multifunsaun, tanba nee mak iha kordenasaun para kareta multifunsaun neebe mak Banku Mundial sosa nee sei apoiu fali mai ambulansia.
Iha ketak Diretor Ezekutivu FONGTIL, Valentim da Costa Pinto informa, nia mos preokupa ho ambulansia.
“Kona ba ambulansia nee ita nafatin sai preokuopasaun, tanba ita nia fasilidade saude sira sira iha munisipiu nee nafatin problema ho ambulansia, tanba ita nia ambulansia nee kleur ona no kondisaun mos aat ona, entaun presija halo manutensaun, neebe husu ba Ministeriu Saude sira tau mos orsamentu ba iha manutensaun nian, atu nunee bele hadia fali ambulansia sira nee, “hakotu nia.
(nat)
