DILI, STLNEWS.co – Relasiona ho mina sona symphoni neebe mak komunidade balun konsumu hodi afeta ba sira nia saude publika, parte Ministeriu Saude (MS) liu husi sira nia dirasaun saude publika ho ninia ekipa rua, hanesan vijilansia sanitaria ho ekipa vijilansia epidemolojia tun ona ba terenu, hodi rekolha dadus no halo investigasaun.
Kestaun nee hatoo husi Diretor Saude Publika iha Ministeriu Saude, Frederico Bosco informa, situasaun ida nee observa iha media sosial neebe mak komesa iha loron 2 liu ba, infelizmente horiseik iha fasilidade saude mos relata katak, iha balun neebe baixa no tenki halo observasaun no tratamentu, i indisiu katak, relasiona ho mina marka Symphoni neebe mak viral los iha media.
“Entaun saida mak MS halo, ita iha ekipa vijilansai sanitaria nomos vijilansia epidemolojia, kuandu situasaun neebe mak mosu relativamente ho intoksikasaun hahan ruma ho problema saude neebe mak hetan, tanba hahan ruma liu-liu problema agudu no problema neebe mosu emediatamente hanesan nee, ho ida nee ekipa rua nee buka para atu halo investigasaun no atu hatene klean produtu saida mak halo hodi hamosu reasaun, entaun horiseik ekipa rua nee tun kedas ba baze hodi halo investigasaun,” dehan nia ba jornalista iha MS kaicoli, Kinta nee (16/03/2023).
Nia akresenta, horiseik simu informasaun ida nee, ekipa sira tun kedas ba iha terenu atu bele hatene kedas situasaun neebe mak mosu nee oinsa, sira rekolha informasaun no halo mos investiga ruma, inklui foti kedas sampel husi produtu, neebe tuir informasaun neebe sira hatoo katak, kria ona problema ba iha sira nia saude.
Entaun ida nee mak ekipa halo, aleinde ida nee husi nivel nasional nian, servisu sentral mos bukan para atu koordena kedas ho entidade relevantes sira, liu-liu instituisaun governu sira neebe mak servisu iha kontrolu, neebe MS servisu ho ida nee para rekolha informaaun no aumezmu tempu koordena oinsa para bele halo intervensaun no investiga klean liu tan ba asuntu ida nee.
Nia afirma, ba propozitu ida nee mak ohin ita nia ekipa iha hela terenu, ekipa nee kompostu husi ekipa vijilansia sanitariu ho epidemolojia, ekipa laboratoriu nasional, ekipa AIFAESA, neebe sira oras nee daudaun iha hela terenu atu bele investiga klean liu ita nia situasaun nee, atu nunee bele foti konkluzaun ida iha tempu badak nia laran.
Horiseik iha duni pasiente nain tolu aprezenta aan iha fasilidade saude, i sira aprezenta sinais neebe mak hatudu iha intoksiksaun, sinais sira nee pesoal saude responde direitamente ba sira nia situasaun, no pesoal saude sira halo tratamentu adekuadu no observa tan sira, no horiseik lokraik nee sira fila fali ba sira nia fatin, tanba sira nia situasaun saude estabil fali ona, entaun sira bele fila fali ba sira nia hela fatin.
Nia hatete, infelizmente MS seidauk hetan informasaun neebe mak atu apoiu ba ida nee, maibe atu foti tipu desizaun sira nee, tanba iha pasu neebe mak tuir mai, iha prosedimentu neebe mak ita tenki tuir, kuandu iha indisius produtu hahan sira hanesan nee.
“Ita presiza foti ninia sampel haruka ba iha laboratoriu nasional HNGV, halo teste para bele kompleta ita nia hanoin sira nee, aleinde ida nee ekipa neebe halo investigasaun mak ekipa vijilansia sanitaria ho ekipa vijilansia epeidemolojia, sira ba haree mos prosesu seluk hanesan maneira prepara ai haan nee oinsa no hahan neebe mak ema konsumu nee oinsa, nee bele kompleta informasaun, depois kuandu ida nee hotu junta hamutuk mak foin bele foti konkluzaun, katak produtu ida nee mak halo duni ka buat seluk mos involve iha neeba, agora foti hela sampel para bele halo estudu hodi bele konfirma,” dehan nia.
Durasaun teste nee sei konfirma lai ho laboratoriu nasional, iha parte saude publika ninia haree mak vijilansia sanitaria no vijilansia epidemolojia, sampel neebe mak foti sei haruka ba iha laboratoriu nasional mak responsavel para halo teste, depois mak laboratoriu nasional fo sai rezultadu ba saude publika para bele halo interpretasaun ba ida nee.
Tuir informasaun neebe mak simu husi pesoal saude sira ba iha Ministeriu Saude katak, pasiente nain tolu nee husi familia ida, neebe mak mai halo tratamentu iha Sentru Saude Formoza, nee horiseik lokraik alta ona no fila kedas ba nia uma.
(nat)
