DILI, STLNEWS.co – Klinika Bairu Pite (KBP) halo screening ba iha komunidade sira neebe afeta malnutrisaun iha Suku Bairu Pite, nee ba inan isin rua, inan fo susu no labarik sira ho idade 0 too tinan 7.
“Kada uma kain neebe mak ami halo screening nee, ita iha programa neebe halao iha fulan hirak liu ba, halo iha Palasiu Presidente nee ita koko para lao nafatin, ita halo hela programa ba labarik sira neebe mak ho malnutrisaun no ba iha inan isin rua no inan fo susun sira nee ita hetan hahan superserial neebe mak suporta mai husi UNFPA nomos liu husi Unidade Nutrisaun Palasiu Prezidente nian, entaun inan isin rua no inan fo susu sira neebe deteta katak, sira iha malnutrisaun ita distribusi kedas superserial nee ba sira para bele konsumu,” lia hirak nee hatoo husi Diretor Klinika Bairu Pite, Inacio dos Santos ba STL, Tersa nee (18/04/2023).
Nia dehan, horiseik simu tan superserial nee 50 dos, atu distribui ba inan isin rua no inan fo susu sira neebe mak deteta problema ho malnutrisaun.
Labarik sira neebe mak ho problema malnutrisaun ho idade 0 too tinan 7 nee ami sei eduka inan sira oinsa atu prepara ai haan neebe mak saudavel.
Nia afirma, tanba bainhira iha tempu udan hanesan nee lalar mos barak, entaun kontribui mos ba iha malnutrisaun. Departamentu malnutrisaun koko para atu halo screening ba malnutrisaun iha Suku Bairu Pite tomak, inklui tama sai uma para halo screening ba labarik sira ho idade 0 too iha tinan 7, inklui mos inan isin rua sira para bele deteta sira nia estatus ba iha malnutrisaun nian.
“Ho ida nee ita konsege halo screening ba ema hamutuk 375, husi numeru nee ita iha 27 kazu mak ho malnutrisaun, husi kazu malnutrisaun 27 nee nain 12 mak kazu grave, depois iha 15 mak ho malnutrisaun moderadu,” katak nia.
Aleinde nee, Ministra Saude Odete Maria Freitas Belo informa, maski numeru redus maibe numeru nee sei iha neeba, bainhira kuandu ita halo komparasaun ho nasaun sira iha sudeste aziatiku ita sei iha pozisaun neebe aas, entaun MS presiza servisu no halo esforsu diak liu tan para bele halo redusaun, redusaun ba kazu labarik sira neebe mak krekas nomos ba inan isin rua sira.
Nia haktuir, entaun presiza mos bee, saniamentu ba uma kain sira, seguransa ai haan inan sira nia, atitude, kultura, no tradisaun fo hahan ba inan isin rua sira nomos ba labarik, ida nee mak MS nia problema, no ami nia planu sira neebe mak atu halo nee lao tuir problema sira neebe mak MS identifika.
“Dadus malnutrisaun aas liu nee iha Munisipiu Ermera iha 63,4 no tuir tan mak Bobonaro 50,3 nomos Ainaro iha 60,3. ida nee mak peskiza neebe mak halo iha tinan 2020,” dehan nia.
(nat)
