KMD Koloka Seguransa Iha Fatin Karantina

Komandu Polisia Nasional Timor Leste (PNTL) Munisipiu Dili, Superintendente Xefe Henrique da Costa. (Dok: STL)

DILI, STLNEWS.co – Relasiona ho Timor Leste neebe foin rezista kazu pozitivu ba Covid-19 hamutuk 13, Polisia Nasioanal Timor Leste liu husi Komandu Munisipiu Dili, kontinua servisu hamutuk ho Ministeriu Saude hodi koloka seguransa ba fatin Karantina.

Komandu Polisia Nasional Timor Leste (PNTL) Munisipiu Dili, Superintendente Xefe Henrique da Costa hatete, Komandu Munisipiu Dili servisu hamutuk ho ekipa saude sira hodi koloka seguransa ba iha fatin karantina sira, atu bele kontrola pasageirus neebe tama iha karantina, hodi kumpri regras sira neebe maka ministeriu saude fo sai ona.

“Fatin neebe ita koloka seguransa nee maka iha fatin haat, Dom Aleixo nian, Cristu Rei, Nain Feto no mos iha Verra Kruz,” hatete nia iha Komandu Munisipiu Dili, Caicoli, Segunda (28/12/2020).

Nia husu ba pasajeirus sira atu kumpri nafatin regras ho diak, hodi bele kuidadu nafatin saude, atu nunee labele iha hadaet ba komunidade sira, tanba ita hatene katak surtu Covid-19 nee iha nasaun hotu hotu tau atensaun maximu ba pandemia nee.

Aliende nee husi PNTL husu nafatin ba pasajeirus sira neebe iha karantina, atu kopera didiak ho governu hodi kumpri nafatin regras neebe maka Ministeriu Saude fo sai ona,”

“Hau fiar katak liu husi ekipa konjunta neebe maka iha, bele servisu hamutuk ho koperasaun neebe diak, hodi bele kontrola buat sira nee ho diak,” dehan nia.

Reportajen: Santina Castro
Editora: Carme Ximenes

LEAVE A REPLY

Please enter your comment!
Please enter your name here