DILI, STLNEWS.co – Relasiona ho kolokasaun profisional saude iha postu saude sira neebe mak pertense iha Munisipiu Dili, nee tuir estratejia Ministeriu Saude (MS) nian.
“Kolokasaun profisionais saude sira tuir politika ka estratejia MS nia iha tinan 2020-2030, tanba kada postu saude ida ita kompleta ho infermeiru 2, parteira 2 no mediku 1 inklui farmasista 1,” lia hirak nee hatoo husi Diretora Servisu Saude Munisipiu Dili, Agustinha Segurado infoma ba jornalista iha Bairu Formoza, Segunda (02/10/2023).
Nia dehan, iha Munisipiu Dili nee iha postu saude 13, maibe iha postu sira neebe ninia nivel atendimentu ba pasiente aas mak hanesan Postu Saude Maloa, Postu Saude Hera nomos Postu Saude Tasi Tolu, nee haree prienxe rekursu humanu liu husi politika Ministeriu Saude (MS).
Tanba ho vizita pasiente ka komunidade nee, liu husi numeru neebe mak deskreve, MS iha politika katak, iha postu saude ida, iha 1.500 too 2.500 harii postu saude ho rekursu neebe mak temi.
Maibe nivel postu saude neebe mak eziste iha Dili laran, tuir lolos nee hasae ona ba sentru saude nivel ida, tanba nia iha ona populasaun neebe liu ona 2.500 nee tenki harii ona sentru saude ida.
“Ita seidauk halo mudansa iha nivel postu saude tolu nee, maibe narealidade sira ho espasu ida naton nee, hodi atende numeru ida neebe mak tuir lolos tama iha politika MS nian, rekursu ita priense ona, maibe seidauk kategoriza ba iha nivel sentru saude nivel ida, tanba espasu nee limita ba iha ita atu estende sae nia nivel, maibe rekursu naton,” tenik nia.
Postu saude husi tolu neebe mak iha nee, mediku ida, parteira ida. Nee kuaze kobre ona, depois farmasista mos iha Dili laran kobre ona, maibe koloka nain rua-rua mak postu saude tolu, nee seidauk kompleta maibe foin ida-ida deit.
Aleinde nee Komunidade Bairo Pite, Belarmino Soares informa, iha Postu Saude Maloa nee ema barak.
“Ita haree komunidade sira iha suku Bairu Pite nee ema barak tebes, maibe suku nee iha deit postu saude ida deit, maibe numeru pasiente barak los, maibe fasilidade postu saude nee la sufisiente ida,” katak nia.
(nat)
