Komandu Vizita Membru PNTL Sofre Moras

Segundu Komandante Polisia Nasional Timor Leste (PNTL), Superintendente Euclides Belo. (Foto: STL/Efizenia da Costa)

DILI, STLNEWS.co – Komandu Jeral Polisia Nasional Timor Leste (PNTL), liu husi komandu PNTL munisipiu Dili, halao vizita ba membru PNTL nain lima, neebe sofre moras iha uma.

Tuir Segundu Komandante Polisia Nasional Timor Leste (PNTL), Superintendente Euclides Belo informa, komandu PNTL munisipiu Dili iha tempu natal nomos tinan foun nee tenta halo vizita ba membru PNTL, neebe durante tinan barak halao servisu hamutuk no oras nee moras hela iha deit uma, la halao servisu hanesan bainbain.

“Iha vizita nee membru PNTL nain lima maka moras, inklui feto ida, tanba nee mak komandu PNTL munisipiu Dili delega ami ba lori apoiu, husi Komandu Jeral neebe mak iha, tanba sira hanesan mos ita nia kolega neebe mak durante nee halao servisu hamutuk ho ita,” dehan nia ba jornalista sira, iha nia knaar fatin Caicoli, Dili, Segunda (18/01/2021).

Nia hatete, iha membru nain lima neebe mak sira halo vizita ba nee hanesan eis komandante Operasionais Dili, Primeiru Sarjentu, Xefe Ajentes, Membru Tranzitu inklui mos Ajentes Xefe feto ida.

“Laos iha Dili nian deit maibe inklui mos maluk sira seluk neebe mai husi munisipiu neebe mak halo tratamentu iha Dili, ami sempre ba vizita mos sira,” dehan Segundu komandante nee.

Euclides Belo haktuir, kondisaun membru sira balun grave hela no balun rekopera tanba nee mak espera katak hanesan hierarquia komandu ho nia servisu vizita bele motiva sira ho familia hotu, atu nunee familia bele akompana nafatin, no konsumu aimoruk tuir oras neebe iha.

Tanba membru balun moras fase raan, nee husu familia sira, tenke lori ba ospital mos lori tuir oras neebe determina ona.

“Ami mos komunika ho doutor PNTL nian, atu iha tempu ruma ami sei ba hamutuk hodi vizita nafatin sira neebe mak moras,” hakotu Belo.

Reportajen: Efizenia da Costa
Editora: Carme Ximenes

LEAVE A REPLY

Please enter your comment!
Please enter your name here