Konsumedor La Fase Liman Antes Tama Loja

(Foto: Espesial)

DILI, STLNEWS.co – Maske dadaun nee Timor Leste sei implementa serka sanitaria iha kapital Dili, maibe konsumedor balun la fase liman, antes tama sosa sasan iha loja.

Dehan Cristafora de Jesus Martins, hanesan konsumedor ba STL, hafoin sosa sasan iha loja area Bairru-Pite, Hudi Laran, Dili, Tersa (23/03/2021).

“Ita nian komunidade sira nee seidauk iha konsiensia ba moras ida nee, tanba ita nian loja no supermerkadu sira prepara ona bee ho sabaun ba ita iha loja oin, maibe ita lakohi fase liman, no ita mai nee tama liu deit, ita ida-idak tenke prevene aan husi moras ida nee, no ita mos lakohi moras ida nee kona ita ho ita nian familia neebe iha uma, ho ida nee ita tenke prevene an, kada loron numeru pozitivu iha kapital Dili kontinua aumenta bebeik, ida nee mos ita nafatin laiha konsiensia,” dehan Cristafora.

Nia dehan, loja nain kumpri ona regras ba implementasaun serka sanitaria, hodi prepara bee ho sabaun iha loja oin, agora ema neebe mai sosa sasan nee, mai tama liu deit no la fase liman, hanesan ohin media mos haree, balun mak fase liman, maibe balun tun husi kareta no motor, sira la fase liman no tama liu ba sosa sasan iha loja laran.

Bainhira STL tenta atu halo intrevista ho loja nain, maibe la konsege, tanba lakohi fo komentariu ba media kona ba asuntu ida nee.

Maibe tuir observasaun STL iha terrenu haree katak, konsumedor menus tama sosa sasan iha loja no balun fase liman ho sabaun antes tama sosa sasan no balun la fase liman, maibe konsumedor sira hotu uza maskra.*

Reportajen: Jacinta Sequeira/Blandina Mauno
Editor: Ekipa STL

LEAVE A REPLY

Please enter your comment!
Please enter your name here