Kontra Regra SS, PNTL Obriga Abitante Halo Teste Swab Masal

DILI, STLNEWS.co – Komandu Jeral Polisia Nasional Timor-Leste (PNTL) liu husi Seksaun Mediku PNTL, koopera ho Ekipa Pilar III Ministeriu Saude halo teste swab masal COVID-19 ba abitante sira, neebe disobedensia kontra regra serka sanitaria (SS) iha kapital Dili.

Desizaun nee Komandu Jeral PNTL no Ministeriu Saude halo ho intensaun atu identifikasaun sedu kondisaun saude abitante sira nuudar meius, hodi prevene aan husi peste letal COVID-19 no husu atu komunidade hapara movimentu hodi hela deit iha uma.

Iha prosesu pasa revista no obrigatoriu abitante sira tuir teste swab masal neebe halao iha areadores Centru Formasaun Polisia (CFP) Comoro, konsege hamosu dezentendimentu protesta husi komunidade 100 resin no polisia, tanba la simu desizaun governu obriga teste swab.

Komunidade Alberto “Unimoc Nahareka” lamenta polisia haruka komunidade sira tama tiha areadores Academia PNTL, maibe haruka fali ema balun fila no balun deit tuir teste obrigatoriu.

“Regra saida mak haruka ami balun tama tiha tuir teste, agora balun haruka fila fali nee la justu,” nia dehan.

Abitante nee hamosu agresaun fiziku ho polisia hodi dudu malu atu loke purtaun PNTL, maibe la konsege, tanba PNTL blokea metin.

Iha fatin hanesan, Komunidade Suku Comoro, Daniel Vicente da Costa konsidera asaun polisia obriga komunidade nee ladun diak, tanba halibur ema sira iha fatin neebe la seguru bele hamosu cluster foun.

“Ami la simu atu halo teste hanesan nee, tanba tuir loloos governu hakarak halo swab koordena ho ami nia xefe suku ida-idak halo teste iha nia suku no aldeia, laos mai obriga ami forma butuk fali iha nee,” dehan nia.

Nia mos lamenta, tanba ema balun halo ona teste swab ona iha sira nia suku, maibe kontinua tuir nafatin teste.

Tanba nee parte seguransa PNTL sira mos nafatin hakalma situasaun hodi husu ba komunidade sira atu intende didiak ba konfinamentu domisioliariu nee.

Iha biban nee, portavoz PNTL, Superintendente Xefe Arnaldo de Araujo dehan, bainhira halo teste swab ba komunidade sira pozitivu COVID-19, ekipa ambulansia PNTL no Ministeriu Saude tenki lori kedas abitante sira ba fatin sentru izolamentu hodi halao tratamentu saude.

Nia dehan, PNTL sei kontinua halo operasaun nafatin iha kapital Dili hodi husu komunidade neebe la kumpre regra no halao movimentu iha kapital Dili atu tuir teste hodi koopera ho desizaun estadu.*

Reportajen: Efizenia da Costa
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Update Covid-19 TL 21 Setembru: Kazu Pozitivu 67 & Rekuperadu 318

DILI, STLNEWS.co – Sentru Integradu Jestaun Krize (SIJK) ohin relata kazu pozitivu iha ema nain 67 no kazu rekuperadu hamutuk 318. "Kazu detetadu foun neebe relata...

Sai PR Labele Halo Terus Povu

DILI, STLNEWS.co – Tuir lian Komunidade Agostina Soares katak, se mak atu kandidata an ba Prezidente Republika ba tinan 2022-2027, labele halo terus tan povu...

Fundasaun Codiva Haklean Konesementu LGBTI Ba Autoridade Lokal

DILI, STLNEWS.co – Fundasaun Codiva haklean informasaun no konesementu konaba asuntu Lesbian Gay Bisexual Trans Intersex (LGBTI) ba autoridade lokal. Haktuir Diretora Ezekutiva Fundasaun Codiva...
%d bloggers like this: