DILI, STLNEWS.co – Kursu vasinalojia importante ba profisional saude sira, nunee bele introdús vasina ho diak.
“Kursu ida ohin nee bolu kursu vasinalojia, vasinalojia nee nia sensia kona ba imunidade, oinsa mak ema dezenvolve vasina nomos oinsa mak atu introdus vasina iha rai ida. Entaun formasaun ida importante tebes, partisipante sira neebe mak ohin partisipa mak hanesan profisional saude pediatria husi HNGV, kor membru NITAG sira nian nomos responsavel husi vizilansia sira,” dehan Prezidente Komisaun National Imunization Technical Advisor Group (NITAG), Mariano da Silva Marques ba jornalista iha Hotel Timor, Segunda (20/11/2023).
Nia hatete, durante sira nee mak servisu barak liu konaba vasina, bainhira sira tuir tan formasaun ida nee bele hasae tan sira nia konhesimentu ba termus foti desizaun.
Nia dehan, objetivu husi kursu nee diak tebes, bainhira sira hetan fiar karik bele implementa ba sira nia desizaun loron-loron nian ba iha Ministeriu Saude (MS), tanba NITAG hanesan grupu teknika neebe mak fo rekomendasaun ba iha MS atu fo introdus kualker vasina, se wainhira membru sira iha konhesimentu neebe menus, entaun difikulta atu fo formasaun neebe diak.
“Tuir planu neebe ami hetan kada tinan, parte ida mak halo kapasitasaun, kapasitasaun nee iha rai laran nomos iha rai liur, kursu ida ohin mos parte ida husi ami nia planu anual antes, atu nunee hasae kapasitasaun ba iha ami nia membru sira, nunee ami bele fo rekomendasaun ida neebe kualidade diak, ba iha MS hodi implementa kualker tipu vasina, hodi prevene moras iha ita nia rai laran,” hatete nia.
Formadu sira neebe iha nee komunika ho peritu sira, neebe peritus sira nee husi Australia, peritus sira halo ona kursu antes iha sira nia rai.
Iha fatin hanesan, Visi Ministru Fortalesementu Institusional, Jose dos Reis Magno informa, abertura ohin nee konaba abertura treinamentu ba kursu vasinalojia, tanba iha nasaun barak seidauk halao kursu ida nee, TL hanesan nasaun ida neebe mak iha inisiativa hakarak atu bele halao.
“NITAG mak atu haree konaba politika no advokasia iha area imunizasaun ninian, haree konaba vasina sira atu oinsa mak bele introdus no implementa nee tenki hetan rekomendasaun husi NITAG, servisu hamutuk ho OMS,” nia dehan.
Nia haktuir, kursu nee importante, tanba nee mak hau dehan, ita koalia deit, maibe laiha treinamentu hanesan nee difisil oituan, maibe ho kursu sira hanesan nee bele aumenta tan profisional saude sira nia hanoin, atu haree konaba vasina nomos programa sira seluk neebe mak relasiona ho vasina nee rasik.
(nat)
