Laboratoriu Nasional Teste 600 Resin Amostra Loron Ida

Vise Koordenadora Forsa Tarefa ba Prevensaun no Mitigasaun surtu Covid-19, Odete da Silva Viegas. (Foto: STL/Jeniche da Costa)

DILI, STLNEWS.co – Tuir Vice Koordenadora Forsa Tarefa ba Prevensaun no Metigasaun Surtu Covid-19 iha Timor-Leste (CIGC-SS), Odete da Silva Viegas hateten, laboratoriu nasional iha kapasidade atu halo teste ba amostra hamutuk 600 kada loron, maibe pesoal sira tenke servisu durante 24 oras nia laran.

Nia hatete, stok reajente neebe disponivel kuaze 10.000 resin, tanba nee sufisiente hela, maibe sira mos halo nafatin esforsu atu aselera prosesu kompras ba reajente sira atu bele antisipa ba situasaun sira grave, tanba dadaun nee akontese ona transmisaun lokal iha rai laran.

“Ami tenke organiza aan diak liu fali atu bele halo servisu, liu-liu jestaun ba rekursu humanu no logistika atu bele responde. Agora dadaun ami aumenta volume traballador, tanba kontaktu besik ho ema sira neebe positivu nee ita identifika iha fatin 10, no posibilidade aumenta tan,” dehan Odete da Silva Viegas, liu husi konferensia imprensa iha sala de situasaun SIJK Tersa,(09/03/2021).

Nia dehan, amostra kuaze 400 husi Munisipiu Covalima neebe dadaun nee pendente hela, tanba ekipa laboratoriu fo prioridade ba amostra kontaktu besik husi kazu konfirmadu sira iha kapital Dili.

Reportajen: Jeniche da Costa
Editora: Domingas Gomes

LEAVE A REPLY

Please enter your comment!
Please enter your name here