DILI, STLNEWS.co – Daudaun nee pasaporte kontinua laiha, pasiente sira labele ba rai liur hodi halo tratamentu ba sira nia saude. Situasaun nee halo sira nia vida iha perigu nia laran.
Kestaun nee hatoo husi pasiente fuan Julio da Costa Beloy ba STL iha Klinika Moris Foun, banhira halo tratamentu saude, Sabadu nee (1/07/2023).
Nia dehan, ekipa Junta Mediku desidi ona atu ba halo tratamentu iha rai-liur, Indonezia, tanba sofre moras fuan ka kurasaun. Seidauk bele halo tratamentu iha rai liur, tanba pasaporte laiha no daudaun servisu atendimentu pasaporte la funsiona, tanba kaderneta pasaporte laiha.
“Durante semana hira nia laran sira ba mai Ministeriu Saude, Ministeriu Justisa no Ministeriu Negosiu Estranjeiru no Kooperasaun (MNEK) atu trata pasaporte, maibe laiha rezultadu. Ita pasaporte tuan ita bele cap deit ba ona, maibe hau nia halo foun,” nia deklara.
Nia husu ba governu foun atu ajuda lalais hodi trata kaderneta, nee tenki iha lalais, atu bele ajuda pasiente sira ba rai liur trata sira nia saude.
Iha fatin hanesan, Pasiente Gilbertihna Pedro do Carmo moras makaas loos, moras feto nian, kankru oan fatin stadium 2, tanba nee hakarak lakohi tenki halo tratamentu saude iha rai liur, maibe pasaporte laiha, tanba nee sei hein nafatin.
“Durante nee hau halo tratamentu la deteta moras, foin lalais nee akontese atakasaun halo raan fakar mai hospital baixa mak deteta fali moras neebe seidauk bele halo tratamentu iha rai laran, tenki ba duni rai liur, tanba nee pasaporte mak impede hau, no hau bele lakon vida bainhira pasaporte laiha,” nia informa.
Nunee mos Diretor Nasional Servisu Apoia Hospitalar no Emerjensia, iha Ministeriu Saude, Nilton da Silva deklara, sira nia parte prosesu lao nafatin ba pasiente sira neebe ekipa junta mediku aprova atu halo tratamentu iha rai-liur, maibe konaba pasaporte nee responsabilidade Minsiteriu Justisa nian. Tanba prosesu lao nafatin, sira neebe mak iha dokumentu, konaba pasaporte nee iha ministeriu seluk mak responde laos sira.
(jen)
