Lansamentu Rezistensia Antibiotika, Hodi Fahe Konhesimentu

DILI, STLNEWS.co – Ohin halo lansamentu ba rezistensia antibiótika, objetivu atu halo konhesimentu oinsa mak atu uza antibiotika.

“Planu prioridade primeiru mak ita atu hasae konhesimentu oinsa mak sira bele hetan informasaun neebe loos, i uza antibiótika karik labele ba hola antibiotik iha liur ka loja, kuandu moras sira tenki ba hasoru mediku sira atu bele haree sira nia moras infeksaun, wainhira presiza antibiotik tenki ho reseita no labele ba hola aimoruk arbiru deit,” lia hirak nee hatoo husi Diretor Nasional Farmacia Medikamentus iha Ministeriu Saude (MS), Delfin da Costa Xavier Ferreira ba jornalista iha Timor Plaza, Tersa nee (17/05/2022).

Nia hatutan, estudante sira nee hanesan alvu ida neebe wainhira ba halo seminar, hodi koalia ho sira nunee sira bele informa ba sira nia inan aman, tanba estudante sira nee matenek no hatene hakerek no koalia, entaun sira bele pasa tutan informasaun ba inan no aman sira.

Nunee mos Diretora Jeral Prestasaun Saude iha MS, Odete Viegas afirma,  hakarak kongratula ba dirasaun nasional farmacia no medikamentus neebe mak lidera prosesu nee, atu fo formasaun ida nee.

“Ita hotu hatene planu asaun ba lansamentu rezistensia antibiotika nee ba iha futuru, ita hahu estabelese iha tinan 2017 – 2020, preparasaun ba iha eventu ida nee ita konsege konsolida ita nia forsa iha koordenasaun no kolaborasaun,” tenik nia.

Nia hatutan, hanesan ema hotu hatene planu asaun ba rezistensia antibiotik  nee ba ema hotu no nasaun Timor Leste, katak iha Timor nee iha ona antibiotik balu neebe mak rejista ona.

(nat)

LEAVE A REPLY

Please enter your comment!
Please enter your name here