DILI, STLNEWS.co – Malnutrisaun mosu, dala barak familia falta konhesimentu konaba hahan neebe iha nutritivu.
“Malnutrisaun mos mosu tanba familia laiha konhesimentu atu uza hahan neebe iha nutrisaun. Hahan nutrisaun laos deit mai husi foos ka susu been, maibe bele mai husi batar, fehuk, modo tahan no seluk tan no falta de konhesimentu,” lia hirak nee hatoo husi Observador Politika Universidade Nasional Timor Lorosae (UNTL) Felisberto de Carvalho ba STL, Kinta (21/09/2023).
Nia hatutan, malnutrisaun nee kauza barak.
“Ida mak tanba kiak, no tanba desizaun politika. Kiak tanba nia laiha asesu ba rekursu, laiha aihan neebe sufisiente, laiha osan, la asesu ba saude no seluk tan,” tenik nia.
Nia afirma, malnutrisaun mos mosu tanba desizaun politika. Desizaun neebe governu foti laos ba ema kiak sira, ezemplu orsamentu neebe aloka ba programa pro ema kiak menus.
Aleinde nee, Diretor Klinika Bairu Pite Inacio dos Santos informa, husi dadus neebe mak Ministeriu Saude hatudu katak, kuaje inan isin rua 23% inan sira mai ho malnutrisaun ho anemia.
“Neebe ida nee mak ami fo atensaun makaas, depois ba labarik sira neebe mak idade 0 too tinan 7, tuir tan mak inan sira neebe mak fo susu, ida nee mak ita halo prioridade uluk, ” tenik nia.
Nia afirma, iha fulan agustu deteta kazu m alnutrisaun 16 nee maioria labarik kiik.
Espesialista Kardiolojista iha HNGV Herculano Seixas dos Santos informa, mensajen ba populasaun sira katak, labele konsumu hahan sira neebe mak laiha nutrisaun.
“Hahan sira neebe mak iha nutrisaun mak hanesan, fehuk, batar, modo tahan, na’an fresku, liu- liu mak produtu lokal sira, no labele konsumu hahan sira neebe mak importa mai husi rai liur nee barak,” hakotu nia.
(nat)
