Medikamentu Ba Moras Mental La Efetivu

Medikamentu neebe profesional saude sira utiliza, hodi halo tratamentu ba pasiente moras mental iha fasilidade saude sira ladun efetivu, atu ajuda pasiente rekupera husi problema psychososial. (Foto Ilustrasaun: GSE)

DILI, STLNEWS.co – Medikamentu neebe profesional saude sira utiliza, hodi halo tratamentu ba pasiente moras mental iha fasilidade saude sira ladun efetivu, atu ajuda pasiente rekupera husi problema psychososial.

Diretor Organizasaun no governmental Psychosocial Recovery and Development In East Timor (PRADET), Manuel dos Santos dehan, iha pasiente balun neebe halo tratamentu iha sentru internamentu Laclubar, iha munisipio Manatuto, rekupera lalais kompara ho sira neebe halo tratamentu iha fasilidade saude sira tanba sira utiliza medikamentu neebe jerasaun segudu avansadu.

“Ita nia governu liu-liu Ministerio da Saude, tinan barak ona sei uza hela medikamentu neebe primeiru jerasaun. Ita kompara ho sentru internamentu iha munisipiu Manatutu postu administrativu Laclubar neebe jere husi minisionario São Joao de Deus, sira uza ona medikamentu segundu jerasaun avansadu,” hatete Manuel ba Jornalista sira, iha nia knaar fatin, Tersa (22/12/2020).

Nia hatutan MdS tenke reve fila fali padraun tratamentu ba moras mental nian, liu-liu medikamentu sira neebe nasaun barak utiliza hodi fo tratamentu ba moras mental ho efetivu no kontribui signifikante ba rekuperasaun pasiente nian.

Tanba iha tinan 2020, sira identifika sidadaun ho problema mental hamutuk nain 90 resin mak hela iha dalan ninin sira, no simu pasiente nain 26 neebe refere husi parseiru servisu no komunidade sira. No identifika nain 150 resin iha komunidade liu husi atividade visita saude familia iha munisipiu.

Entertantu Diretora Nasional Kontrola Moras iha Ministeriu da Saude, Doutora Josefina Clarinha João dehan, iha medisina mudansa padraun tratamentu nee normal no nasaun seluk utiliza ona ai-moruk sira avansadu, maibe iha Timor pasiente sira sei iha responde neebe diak ba medikamentu sira neebe uza iha rai laran.

“Ita mos tenke hare ba responde ita nia maluk sira neebe moras mental, se sira nia responde diak hela ba tratamentu neebe ita iha nee hau sente kontinua tuir ida neebe pasiente sira responde diak,” nia afirma.

Nia dehan tratamentu ba moras mental nee laos deit ho medikamentu, maibe presiza suporta husi entidade hotu liu-liu familia tanba klinika ba moras mental nian mak familia. Tanba taxa moras mental iha rai laran aas no iha posibilidade aas tanba problema sosial sei barak.*

Reportajen: Jeniche da Costa
Editora: Carme Ximenes

LEAVE A REPLY

Please enter your comment!
Please enter your name here