DILI, STLNEWS.co – Mediku Timor oan husu ba governu bele kontrolu kualker tipu bee neebe mak tama mai iha Timor Leste, tanba bele fo impaktu ba iha rins.
Kestaun nee hatoo husi Koordenador Intervensaun no Invasiva Minimarly Invasive HNGV, Raimundu dos Santos, hanesan mediku Timor oan, hakarak sujere ba iha governu haree konaba kualker tipu bee neebe mak tama mai iha Timor, nee presiza hatene ninia konteudu.
“Tanba ita hatene katak, povu barak mak uza bee matan direitamente, hanesan iha foho sira nee uza deit bee neebe moris no mota laran sira uza hodi konsumu. Bee sira nee hodi tein no hemu direita no balun nono mak hemu, depois iha Dili laran nee bee posu mos barak, entaun sira parte husi saude publiku neebe mak servisu hamutuk iha kada suku, atu hatene bee posu ida iha suku ida nee hodi bele prevene, kompozisaun iha bee nee rasik, mak lori impaktu ladiak ba rins ba Timor oan sira iha rai laran,” dehan nia ba jornalista iha HNGV, Kuarta (27/09/2023).
Nia afirma, agora balun hatene ona kompozisaun neebe mak hasae risku ba formasaun fatuk iha rins, karik governu bele suporta para halo uluk tratamentu ba bee sira nee, antes povu konsumu.
Nia dehan, agora iha atividade desportu sira, ho durasaun kleur liu, atu bele fo tempu para atleta sira sai hemu tiha bee, depois mak kontinua fila-fali, no ba iha eskola sira mos presija iha alarma, eskola tempu naruk liu tenki iha alarma hemu bee nian, hanesan mos iha servisu fatin.
“Tanba ita lakon bee laos husi mii ho kosar deit, maibe ita tur iha AC laran mos bee balun sai hela, ita lasadar, tanba liu husi fani ho mear, depois koalia deit mos likuidu balun sai hela,” tenik nia.
Nia afirma, neebe husu ba parte saude publiku nian, atu bele informa ba populasaun sira katak, rai manas hanesan nee presiza hemu bee barak.
(nat)
