Ministeriu Saude Entrega Estudante Bolseirus Ba UNTL

Ministeriu Saude (MS), halo serimonia termu entrega bolseirus Pos Laboral Enfermajem no Parteira ba Universidade Nasional Timor-Leste, atu kontinua sira nia estudu iha UNTL. (Foto: STL/Jeniche da Costa)

DILI, STLNEWS.co – Ministeriu Saude (MS), halo serimonia termu entrega bolseirus Pos Laboral DIII Enfermajem no DIII Parteira ba Universidade Nasional Timor-Leste, atu kontinua sira nia estudu iha UNTL.

Ministra Saude (MS), Odete Maria Freitas Belo hatete, objetivu ba selebra serimonia termu entrega bolseirus estudante Diploma Trez (DIII), Pos Laboral Enfermajem no Parteira, husi Ministeriu Saude ba Universidade Nasional Timor-Leste (UNTL).

“Ami entrega profesional saude sira neebe durante nee servisu, ami entrega ba UNTL atu kontinua sira nia estudu, tanba ami iha infermeiru nain 90, parteira 90, total hamutuk 180 pesoas, sira nee atu kontinua sira nia estudu iha UNTL atu hasae diak liu tan sira nia konesementu, no abilidade area enfermajem no parteira,” dehan nia liu husi diskursu, wainhira entrega bolseirus Pos Laboral Enfermajem no Parteira, iha Palácio das Cinzas, Caikoli-Dili, Segunda (01/02/2021).

Nia esplika, MS kontinua fila-fali prosesu halo tiha ona iha tinan kotuk liu ba, atu eleva profesional saude sira neebe durante nee servisu tiha ona, maibe susar atu tuir formasaun, entaun ho bolseirus Pos Laboral nee sira eskola tan para aumeta sira nia abilidade no konesementu neebe diak liu.

Tanba ema saude dala ruma sira eskola nee iha Indonezia nia tempu, neebe agora nee dezenvolvimemtu oi-oin area saude mos dezenvolve entaun, tenke fo formasaun neebe sira iha tiha ona.

“Ita espera katak sira iha kapasidade, laos kapasidade uluk nian, maibe kapasidade neebe tuir evolusaun,” tenik nia.

Entertantu Reitor UNTL, João Soares Martinus dehan, ohin asina akordu entre estudante Pos Laboral husi Enfarmajem no Parteira Diploma Trez (DIII) nian, akordu nee asina husi Ministeriu Saude hanesan atu fo nia ema sira nee ba UNTL hodi halao estudu iha neeba.

“Hau hanesan Reitor UNTL, sai reprezentante UNTL simu sira nomos ho akordu sira nee, ami bele hahu ona aprendizajen ba bolseirus Pos Laboral Enfermajem no Parteira,” nia Informa.*

Reportajen: Jeniche da Costa
Editor: Carme Ximenes

LEAVE A REPLY

Please enter your comment!
Please enter your name here