Ministra Saude Fo Sala VIII Governu, Husik Hela Problema Aimoruk

DILI, STLNEWS.co – Relasiona ho stok aimoruk hotu iha armajen Institutu Nasional Farmasia Mediku (INFPM), Ministra Saude Elia dos Reis Amaral fo sala ba VIII Governu mak husik hela problema nee ba IX Governu.

Nia esplika, stok aimoruk durante laiha armajen nee tanba VIII Governu husik hela foer mai iha IX Governu Konstitusional.

“Ita boot sira hatene katak, VIII Governu husik problema mai iha IX Governu, momentu hau simu pasta hanesan Ministra Saude, ita stok aimoruk mil mak la iha armajen, entaun ho ida nee mak hau propoin orsamentu US$ 6 milhoes hodi ba sosa ho karakter urjensia,” nia esplika ba jornalista sira, hafoin remata Konselhu Ministru iha Palasiu Governu, Kuarta (10/01/2024).

Nia afirma, ho orsamentu neebe mak boot tenki liu husi prosesu administrativu iha tribunal de kontas, nunee bele hetan vistu previu atu bele kompras medikamentu ho urjensia.

“Ho osan neebe mak boot ita tenki liu husi prosesu administrativu, maibe iha momentu neeba ita hetan kedas vistu previu no kontratu neebe mak iha tuir dalan legal, entaun ho ida nee mak fim de Novembru ita halo kontratu ho kompanhia Sali-Magu rasik atu kompra aimoruk ida nee. Ho nunee iha fulan Dezembru kompanhia hatama reajente ho konsumavel iha faze dahuluk inklui ho aimoruk konaba mear no tuir lista neebe mak sira fo, katak hamutuk 47 item mak mai uluk,” nia relata.

Nunee faze daruak sei mai hamutuk 88 item iha loron 15 too 20 fulan nee ho aimoruk esensial sira hodi responde ba situasuan real neebe mak iha.

Ba oin problema aimoruk la rezolve iha fasilidade saude teritoriu nasional, Ministra Saude hateten, kompetensia Primeiru Ministru atu haree ba oin.

Problema aimoruk daudaun nee akontese iha fasilidade saude stok aimoruk mamuk, ho nunee Ministra Saude hatan ba pergunta jornalista sira katak, aimoruk nee mak la rezolve nee kompetensia Primeiru Ministru nian ba oin.

“Ba oin mak problema aimoruk la rezolve ida nee kompetensia Primeiru Ministru nian atu haree ba oin,” tenik nia.

(nat)

LEAVE A REPLY

Please enter your comment!
Please enter your name here