DILI, STLNEWS.co – Hahu fulan Fevereiru too mai agora, Sentru Saude Komoro rejista pasiente ho problema konjungtivitis ka matan mean hamutuk 230 resin, numeru nee aas.
Hatete Emilia Ayati de Sousa ba STL iha nia knaar fatin Sentru Saude Komoro, Kinta nee (16/03/2023).
“Ita rejistu moras konjungtivitis ka matan mean kuaze 230 resin, ita haree ida nee infesaun neebe halo matan bubu, mean no moras,” hatete nia.
Nia esplika, konaba tratamentu sempre lao nafatin, maski pasiente matan mean mak barak, sira mai konsulta depois simu aimoruk fila ba uma, la baixa.
“Ita nia mediku sira atende depois fo aimoruk, sira fila ba uma laos baixa, baixa ita simu moras neebe periza baixa duni,” nia esplika.
Iha fatin ketak, Mediku Espesialista Matan iha Sentru Nasional Matan Díli, Julia Rosalina Cesar Magno informa, iha fulan Fevereiru nia laran sira rejista pasiente ho problema konjungtivitis ka matan mean hamutuk 260 resin, ho numeru neebe aas.
Nia informa, moras konjungtivitis nee infesaun neebe halo matan bubu, mean no moras, maibe la komplikasaun seluk neebe afeta sira nia vizaun.
Tanba moras ida nee bele kauza husi alerjia, bakteria, virus no kazu neebe sira atende barak liu kauza husi bakteria no virus.
“Hakarak hatoo ba ita nia komunidade sira katak, kuandu iha matan mean diak liu buka mediku sira atu hetan tratamentu, labele naran sosa aimoru no uza aimoruk sein ezaminasaun husi mediku sira,” nia esplika.
Nunee mos pasiente Mariana do Carmo informa, matan mean agora barak tebes, tanba konba iha bairu laran ida ou uma laran ida mak matan mean, nee tenki hadaet ba sira seluk neebe seidauk matan mean.
“Ita kuandu matan mean haree loron manas la diak, matan bubu, katar no haree loron manas labele, tanba nee hau mai konsulta, agora sira fo ona aimoruk hau ba tau no musan nee ba hemu,” nia afirma.
(jen)
