DILI,STLNEWS.co – Hahu iha 2021 to’o mai ohin loron Ministeriu Saude (MS) haruka aimoruk item 13 ba Australia, hodi halo teste ba kualidade.
Kestaun ne’e hato’o husi Diretor Nasional Farmasia no Medikamentu Ministeriu Saude, Delfim Fereirra informa, iha ona relatoriu rezultadu teste aimoruk, ne’ebe liu husi akordu ida entre Governu Timor liu husi Ministeriu Saude ho Governu Australia, halo iha 2021 Setembru.
“Agora rezultadu saida mak ita hala’o ona iha Setembru 2021 to’o ohin loron, iha faze rua mak ita halo ona, iha loron 13 Setembru 2022 ita haruka ona primeiru segmen ba halo ona teste iha ne’eba, depois daruak ne’e ita haruka iha loron 21 Marsu 2023 ne’e, entaun segundu faze ba halo teste,” dehan nia ba jornalista sira iha Kaikoli, Sesta nee (28/04/2023).
Nia afirma, agora iha ona relatoriu konaba rezultadu teste kualidade aimoruk ne’ebe liu husi akordu ida entre Governu Timor liu husi Ministeriu Saude ho Governu Australia.
Nia akresenta, agora iha loron 21 Marsu tinan ne’e, rezultadu rua mai tan ona, ida mak ampixilin ho amoxilin tablet 500 mili gram, ne’ebe mak rezultadu pasa, tanba sira iha testu kualidade nian ne’e anexu. Depois rezultadu rua nian ne’ebe mai daruak mak amoxilin ho ampicilin rezultadu pasa.
“Aimoruk rua ne’ebe pasa, agora orientasaun ami halo relatoriu ba iha Ministra Saude, iha loron 26 abril. Ministra Saude hatun ona despaisu mai, agora ba fali SAMES atu re-distribui fila fali amoxilin ho ampicilin ne’ebe mak ita deskonfia laiha kualidade, maibe to’o ikus ninia kualidade diak, entaun hahu horiseik SAMES halo ona distribuisaun ba iha fasilidade governu nian, no iha munisipiu nian mos ami haruka distribui fila fali aimoruk item rua hanesan amoxilin ho ampixilin,” dehan nia.
Aimoruk item 6 ne’ebe ninia rezultadu seidauk mai ne’e sei iha prosesu teste hela, presiza finaliza tiha nia item ne’e 8 hodi kompleta, maibe sei mai fazeadamente. Tanba laos teste deit ita nia aimoruk husi nasaun 13, ne’ebe sei lori tempu ne’ebe mai fazeadamente, ne’ebe ita hein katak, item seluk ne’ebe mak seidauk mai ne’e bele mai tan iha fulan ida ka rua nia laran.
(nat)
