DILI, STLNEWS.co – Ohin Ministeriu Saude (MS) hamutuk ho linhas ministeriu hotu-hotu, halao enkontru importante ida konaba importansia codex alimentariu nian.
Kestaun nee hatoo husi Diretora Jeral Prestasaun Saude iha Ministeriu Saude, Odete Viegas informa, objetivu rua ba enkontru ohin, ida atu dezimina informasaun sobre importansia codex ba iha Diretor Jeral sira no linhas ministerial, ida fali mak atu halo treinamentu ba iha fokal poin husi linhas ministerial neebe mak sei tama ba iha komisaun nasional ba codex nee rasik.
Nia afirma, iha intervensaun nee dehan, TL atu tama ba iha codex member nian nee liu husi prosesu naruk ida, neebe mak halao iha tinan hirak liu ba, infelizmente iha tinan 2018 Timor-Leste konsege sai membru ba iha codex alimentares.
“Importansia husi codex alimentares nee rasik, oinsa atu bele proteje ita nia konsumedores sira ba iha protesaun saude no ba konsumedores sira neebe ita mos haree katak, iha ita nia rai importansaun ai haan lubuk neebe mak ita la konsege kontrola, maibe liu husi meus ida nee, ministeriu idak-idak bele iha ninia responsabilidade no ninia papel atu bele prepara aan, no kapasita rekursu neebe mak iha, hodi prepara sira nia rekursu no prepara mos estandarizasaun ba iha hahan seguru no kualidade hahan, atu nunee ita mos bele dezenvolve ita nia aan, para bele kompete iha nivel rejional nomos ba iha internasional,” dehan nia ba jornalista iha Hotel Novu Turizmu, Tersa nee (14/03/2023).
Nia hatutan, koalia konaba sekretariadu neebe mak husu mos pontu vokal husi linhas ministerial, ohin marka prezensa iha nee ministeriu lima, mak hanesan Ministeriu Saude, Ministeriu Agrikultura, Ministeriu Obras Publikas, Finansas no Komersiu Industria, Aifaesa, no seluk tan.
Nia akresenta, sira partisipa hotu iha nee tanba responsabilidade nee laos ministeriu ida nian maibe responbilidade nee husi linas ministeriu oin- oin, parseiru ajensia nomos instituisaun publiku inklui instituisaun privadu neebe mak sei toma responsabilidade no oinsa atu haree politika estratejia nomos regulamentu neebe mak koalia kona ba aihan seguru nomos hahan seguru neebe ho kualidade.
Iha fatin hanesan, Reprezentante Organizasaun Mundial Saude Iha Timor Leste Arvind Mathur informa, Timor Leste sai ona membru ba codex iha tinan 2018.
TL sai nuudar membru codex no fo mos servisu boot ida ba governu TL, haree sira nia esforsu no saida mak presiza atu halo.
“OMS servisu hamutuk ho MS halo ona asesment ida, entaun ida nee sai hanesan oportunidade ida bele haree lukunas no problema ruma neebe mak durante nee ita infrenta no saida mak ita atu hadia no haforsa liutan, husi parte OMS ninia ami kontinua fo ami nia apoiu liu- liu ba haforsa sistema aihan no saida mak atu dezenvolve no saida mak presija influensia, dezenvolve padraun aihan ninian hodi kontinua haforsa ita nia sistema saude, ba ai haan neebe mak tama no ai haan neebe mak produs iha rai laran,” dehan nia.
Nunee mos Diretur Nasional Saude Publika, Frederico Bosco informa, atu kontrolu kona ba ai haan no hahan sira nee presiza linha ministerial sira hotu nia apoiu.
“Neebe ita presija servisu hamutuk hodi haree ba oinsa mak implementa ai haan seguru ba iha ita nia komunidade sira, ” dehan nia.
(nat)
