DILI, STLNEWS.co – Ministeriu Saude (MS) hamutuk ho parseiru hotu inklui ho Cruz Vermelha Timor Leste (CVTL), hodi halo avaliasaun ba servisu bee no saneamentu iha TL.
Lia hirak nee hatoo husi Diretor Jeral Tekniku Cientifiku iha Intitutu National Saude Publika Timor-Leste (INSP-TL), Frederico Bosco Alves dos Santos informa, MS hamutuk ho parseiru sira husi linas ministerias ho organizasaun non governamental sira inklui CVTL.
“Ita halo enkontru nee ho objetivu atu halo avaliasaun ba servisu neebe durante nee kada entidade sira hotu responsabiliza iha area bee no saneamentu,” dehan nia ba jornalista sira iha edifisiu CVTL Bairu Formoza, Tersa (15/08/2023).
Nia haktuir, papel importante husi ministeriu mak atu prezerva saude publika ba iha komunidade, entaun ohin dirasaun jeral tekniku sientifiku liu husi dirasaun saude publika no departamentu saude ambiental, realiza enkontru atu nunee bolu hamutuk ita nia parseiru sira, hodi bele diskuti kada papel neebe husi parseiru sira ezerse, atu bele kontribui diak hodi asesu ba iha bee, entermus husi kualidade ho kuantidade, nomos saneamentu para depois bele prezerva saude publika iha nasaun ida nee.
Iha fatin hanesan, Sekretariu Jeral CVTL, Luis Pedro informa, enkontru ohin nee ho objetivu oinsa mak atu bele haforsa liu tan ami nia koordenasaun no kolaborasaun entre parseiru hotu- hotu, CVTL, MS nomos parseiru hotu-hotu para bele halo diskuti, depois atu haree asuntu balun neebe mak relasiona ho bee no saneamentu.
“Ita haree katak, bee ho sanitasaun nee fator ida neebe mak determinante relasiona ho ema nia saude, tanba ida nee mak CVTL kontinua iha komitmentu nafatin, atu servisu ho MS,” tenik nia.
Nia dehan, servisu neebe CVTL halo nee alina ho governu nia programa, tanba ida nee mak durante nee halo, implementa programa bee sanitasaun, CVTL sempre koordena besik ho MS ho parseiru sira seluk.
Nia akresenta, programa sira nee tantu iha area rural nomos liga ba programa sira seluk neebe mak relasiona ho oinsa mak halo jestaun ba bee, depois fo mos edukasaun ba iha komunidade sira utilizasaun bee nomos oinsa mak saude neebe hijeni ba komunidade sira.
(nat)
