MS Husu Negosiante Faan Hahan Tenki Ho Seguru

DILI, STLNEWS.co – Ministeriu Saude (MS) liu husi servisu vizilansia husu ba negosiante sira neebe mak halao atividade faan hahan iha dalan ninin, tenki prepara hahan neebe seguru ba komunidade sira.

Diretora Nasional Edukasaun no Promosaun Saude iha Ministeriu Saude, Emilia de Jesus Alves Mendonça hatete, atu kontrola konaba hahan neebe maka la seguru, no labele faan nee kompetensia ba parte relevante ninian.

“Ba negosiante sira neebe faan ai haan iha dalan ninin MS laos bandu atu halo negosiu no faan hahan ba ita nia oan sira, maibe atu hatete katak, responsabilidade saude publiku nian liu-liu ba ita nia oan sira nee, kabe ba ita hotu nian, estadu, inan aman, sosiedade inklui familia sira neebe halo negosiu ba kulinaria iha dalan ninin sira,” dehan Emilia de Jesus Alves Mendonça ba jornalista sira iha nia knaar fatin Kaikoli, Tersa (06/02/2024).

Nia afirma, MS la bandu atu familia sira labele faan ai haan iha dalan ninin, maibe husu atu negosiante sira neebe mak faan hahan, tenki segura katak, hahan seguru no utiliza istrumentu sira atu asegura mos hahan neebe sira prepara nee.

“Importansia mak nee, hau labele dehan ita boot sira labele faan, tanba ezijensia familia nian bele faan, maibe asegura katak, hahan sira neebe mak imi faan nee seguru duni. Prepara ho moos bainhira ba faan iha dalan ninin karik uza instrumentu sira neebe proteje rai rahun, aar sira polusaun labele daet ba hahan sira, no asegura katak hahan neebe mak la saudavel ona ka aat ona labele faan,” nia husu.

Nia informa, Ministriu Saude iha save lima oinsa prepara ba ai haan neebe seguru mak hanesan presiza ema ida neebe prepara hahan tenki hamoos aan antes, modo no hahan tenki fase halo moos, instrumentu hanesan sanan bikan tenki prepara ho moos no fase ho rinso ou mama lemon.

Diretora nee esplika liu tan katak, dekretu lei numeru 10 /2004 fo kompetensia ba Ministeriu Saude liu-liu ba servisu vijilansia hodi haree konaba oinsa kontrola ba ai haan seguru.

(nat)

LEAVE A REPLY

Please enter your comment!
Please enter your name here