DILI, STLNEWS.co – Ministeriu Saude (MS) ohin halo lansamentu ba kampanhia integradu promosaun edukasaun saude, relasiona ho nutrisaun, saude inan ho oan, prevensaun ba moras dengue, tuberkuloze nomos moras sira seluk.
Visi Ministru ba Fortalesementu Institusional, Jose dos Reis Magno informa, lansamentu neebe mak ohin halao iha aldeia laloran suku bairu pite, atividade ida nee hola parte mos iha programa integradu saude, neebe programa hotu- hotu nee labele halao ida- idak nian, maibe tenki hamutuk, entaun integradu.
“Lansamentu ida nee laos akontese deit iha Dili laran, maibe atividade ohin nee halao iha Timor laran tomak, neebe ita espera ho prezensa mediku espesialista sira ba too iha nivel suku no area remotas sira, entaun bele fo atensaun diak ba ita nia populasaun, tanba maioria populasaun sira hela iha area remotas, no iha aldeia ho suku sira, konaba moras sira hanesan dengue, tuberkuloze, nutrisaun nomos moras sira seluk,” dehan nia ba jornalista iha Aldeia Laloran, Suku Bairu Pite, Segunda (20/11/2023).
Nia dehan, IX Governu Konstitusional mos fo hela prioridade ba programa nee para oinsa bele halao.
Nia hatutan, nunee mos atu empodera komunidade sira, tanba atividade akontese iha nivel aldeia, no ohin involve mos voluntariu komunitariu, neebe sira mak sei habelar informasaun saude, liu-liu kona ba formasaun, prevensaun ba iha komunidade sira neebe mak labele hola parte iha atividade ohin. Agora konaba aspetu tratamentu mediku espesialista mak halo atendementu.
Nunee mos Pastor iha Igreja Kristaun Agape Nilton Lima hatutan, ohin halao atividade lansamentu programa integradu ida nee.
“Ami nia mediku espesialista sira partisipa iha hodi halo konsulta mos ba ita nia pasiente sira hodi halo prevensaun antes, tanba ita nia moras dengue, moras TBC, nutrisaun no moras sira seluk kontinua aas iha ita nia rai Timor,” dehan nia.
(nat)
